Starfsmönnum fækkað um 400

Stöðugildum starfsmanna á Landspítala fækkaði um 300 á fyrstu átta mánuðum ársins, segir Björn Zoëga, forstjóri Landspítalans, í samtali við Vísi. Hann áætlar að starfsmönnum hafi fækkað um 400 á þessum tíma en launakostnaður hefur lækkað um 973 milljónir króna. Björn segir að auk þess sem starfsmönnum hafi fækkað skýrist lægri launakostnaður af minni yfirvinnu og einhverjir starfsmenn hafi tekið á sig launalækkanir.

Björn segir að langflestir starfsmenn sem látið hafi af störfum á spítalanum hafi hætt vegna eðlilegrar starfsmannaveltu. Til dæmis hafi fólk farið í nám. Hann áætlar að færri en 50 manns hafi verið sagt upp störfum í hagræðingarskyni. Langlegudeild hafi verið lokað á Kleppi og þar hafi 27 misst vinnuna. Þá hafi fólk misst vinnuna vegna skipulagsbreytinga sem gerðar voru á eldhúsi Landspítalans.



Starfsfólk meðvitaðara um kostnað

Björn segir að mikill árangur hafi náðst í lækkun á rekstrarkostnaði spítalans að undanförnu. Það sé ekki síst vegna þess að starfsmenn fari betur með alls kyns hluti sem notaðir eru í rekstri spítalans. Kostnaður vegna pappírsnotkunar hafi dregist saman um 3,5 milljónir króna, kostnaður vegna blekhylkja hafi dregist saman um 7 milljónir, kostnaður vegna einnota eldhúsáhalda hafi dregist saman um 3 milljónir. Þá hafi kostnaður vegna rafmagnsnotkunar dregist saman um 7,5 milljónir og kostnaður vegna hitaveitu hefur dregist saman um 6 milljónir.

„Allt þetta eru svona smáhlutir, en þetta er hluti af þeirri meðvitund að það verði að fara vel með hlutina," segir Björn. Hann segir að unnið hafi verið markvisst að því að auka kostnaðarvitund fólks. Til dæmis séu mest notuðu hlutirnir á sjúkradeildunum verðmerktir þannig að starfsfólk viti hversu miklum peningum það er að eyða. Þetta eigi við, jafnvel þótt um sé að ræða ódýra hluti eins og bómullarhnoðra.