Innlent

Skortur á vinnuafli mun aftra uppbyggingu á íbúðarhúsnæði

Jón Júlíus Karlsson skrifar
Formaður meistarafélags húsasmiða telur það óraunhæft markmið hjá Reykjavíkurborg að ætla að reisa yfir fjögur þúsund íbúðir á næstu þremur árum. Mikill skortur sé á iðnaðarmönnum í landinu og ekki eigi að byggja þær íbúðir sem mest eftirspurn sé eftir.

Mikið líf hefur færst í byggingu íbúðarhúsnæðis í Reykjavík á síðustu mánuðum. Lítið sem ekkert var byggt árið 2010 í kjölfar efnahagshrunsins en markaðurinn er að glæðast og gott betur. Stefnt er að því að byggja 4.200 íbúðir í Reykjavík á næstu þremur árum.

Í mars síðastliðnum kynnti Dagur B. Eggertsson borgarstjóri áætlun um uppbyggingu í Reykjavík á næstu árum. Eins og sjá má á þessari mynd er mikil uppbygging framundan þar sem lögð verður áhersla á þéttingu byggðar. Jafnframt er gert ráð fyrir að ferðaþjónustan muni byggja 1200 hótelherbergi á næstu þremur árum.

Jón Sigurðssson, formaður meistarafélags húsasmíða, segir að það sé hulin ráðgáta hvernig þessi miklu byggingaráform eigi að ná fram að ganga. Mikill skortur sé á iðnaðarmönnum í byggingariðnaði.

„Þetta eru eingöngu pólitískar ákvarðanir og ekkert samráð haft við byggingarmarkaðinn, hvað við þurfum af lóðum og hvernig lóðir. Það eru bara einhverjir pólitíkusar sem setjast niður og ákveða hvernig þeir vilja hafa hlutina án þess að atvinnumarkaðurinn hafi nokkuð með það að gera. Síðan eigum við að leysa vandamálið eftir á,“ segir Jón.

Hátt fermetraverð

Hann gangrýnir jafnframt tegundir þeirra íbúða sem byggja á í Reykjavík á næstu árum. Kallað sé eftir ódýrum íbúðum. Fermetraverð í nýjum íbúðum nærri miðborginni er nálægt 400 þúsund krónum.

„Það á að byggja á dýrasta svæðinu í bænum,“ segir Jón. „Hver ætlar að kaupa þessar íbúðir? Þetta verða ekki ódýrar íbúðir á ódýrum leigumarkaði. Þetta verða dýrustu íbúðirnar í bænum. Einhvers staðar hlýtur að þurfa að byggja ódýrar íbúðir fyrir t.d. ungt fólk sem er að byrja að búa. Það kaupir ekki svona íbúðir.“

Nánar í myndbandinu hér að ofan.




Fleiri fréttir

Sjá meira


×