Skattbyrði láglaunafólks minnkar

Skattbyrðin hjá fólki með tekjur undir 6 milljónir í árstekjur eða minna var lægri við álagningu fyrir árið 2009 en hún var fyrir árið 2008, sagði Steingrímur J. Sigfússon fjármálaráðherra á Alþingi í dag. Steingrímur sagði að þetta þýddi að ríkisstjórninni hefði tekist áætlunarverk sitt með skattkerfisbreytingum. Að hlífa hinum launalægri.

Steingrímur sagði að efnahagslífið stefndi í rétta átt. Landsframleiðsla stefni í að dragast mun minna saman en spár gerðu ráð fyrir. Vextir haf lækkað umtalsvert og verðbólga sömuleiðis. Hann benti á að kaupmáttur væri farinn að hækka á nýjan leik. Mest hjá lægst launaða fólkinu.

Steingrímur tók þó undir með forsætisráðherra að auðvitað væri erfiður vetur í nánd. Hér þyrfti að fara í gegn með einhver erfiðustu fjárlög nokkru sinni. „En það er óendanlega mikið í húfi að okkur takist það og þá er það versta afstaðið," sagði Steingrímur.