Sigurður og félagar í gæsluvarðuhaldi til 1. júlí

Þrír karlar hafa verið úrskurðaðir í áframhaldandi gæsluvarðhald til 1. júlí að kröfu lögreglunnar á höfuðborgarsvæðinu og er það gert á grundvelli rannsóknarhagsmuna. Mennirnir sem um ræðir heita Sigurður Ólason, Ársæll Snorrason og Gunnar Viðar Árnason.

Mennirnir eru grunaðir um að vera flæktir í umfangsmikið fíkniefnamál sem snýr að mörg hundruð kílóa kókaínsmygli og teygir anga sína til þrettán landa. Grunur leikur á að Íslendingarnir tengist alþjóðlegum glæpasamtökum sem bendluð eru við fíkniefnamisferli og peningaþvætti.

Þeir hafa allir kært niðurstöðuna til Hæstaréttar en úrskurðurinn var kveðinn upp í Héraðsdómi Reykjaness í dag. Þremenningarnir, sem eru á þrítugs-, fimmtugs- og sextugsaldri, hafa áður komið við sögu hjá lögreglu.

Rannsókn málsins er mjög viðamikil en að henni hafa komið lögregluliðin á höfuðborgarsvæðinu og Suðurnesjum auk tollyfirvalda. Rannsóknin er einnig unnin í samvinnu við lögregluyfirvöld í nokkrum öðrum löndum.