Sektaður fyrir að smygla Rolex úri og silkihálsbindum

Karlmaður hefur verið dæmdur til þess að greiða fjögur hundruð þúsund krónur í sekt í Héraðsdómi Reykjavíkur fyrir að koma með tollskyldan varning inn í landið án þess að tilgreina hann sem slíkan.

Um var að ræða Rolex Oyster armbandsúr sem kostaði rúmlega 600 þúsund krónur auk fimm silkihálsbinda sem maðurinn kom með til landsins um miðjan janúar á síðasta ári en hann var þá að koma frá Danmörku. Þá var hann með 21 silkihálsklút en verðmæti þeirra eru tæpar 300 þúsund krónur.

Maðurinn var einnig með leðurhandtösku sem kostar 56 þúsund krónur. Með honum var annar maður sem var með hluta af tollskylda varningnum.

Borgi maðurinn ekki skuldina innan fjögurra vikna frá uppkvaðningu dómsins skal hann sæta 24 daga fangelsi. Varningurinn var gerður upptækur.

Samkvæmt lögum þá mega ferðamenn, búsettir hér á landi, hafa varning meðferðis hingað til lands að verðmæti allt að 65.000 króna, miðað við smásöluverð á innkaupsstað, en verðmæti einstaks hlutar skuli þó að hámarki vera 32.500 krónur.