Segja uppsögn Gunnars óvægna aðför að honum

Uppsögn forstjóra Fjármálaeftirlitsins Gunnars Þ. Andersen er óvægin aðför að honum, segir stjórn Félags forstöðumanna ríkisstofnana í ályktun sem hún sendi fjölmiðlum rétt í þessu. Stjórnin krefst þess að forstöðumenn ríkisstofnana njóti þeirra lögbundnu réttinda að farið sé að stjórnsýslulögum og starfsmannalögum þegar fjallað er um störf þeirra á vegum stjórnvalda.

Það eru réttindi opinberra starfsmannna hér á landi að njóta andmælaréttar og að gætt sé meðalhófs ef upp koma álitaefni um störf eða hæfni. Við mat á hæfni forstöðumanna sé mikilvægt að byggt sé á faglegum atriðum en ekki tilfinningum eða huglægum þáttum. Þetta sé ekki síst mikilvægt nú þegar forstöðumenn ýmissa stofnana vinni að erfiðum og viðkvæmum verkefnum sem snúa að uppgjöri vegna hruns fjármálakerfisins hér á landi 2008. Á slíkum tímum þurfi staðfestu, úthald og stuðning fagráðuneytis og ráðherra.

Í kvöldfréttum Stöðvar 2 í kvöld kom fram að Steingrímur J. Sigfússon, efnahags- og viðskiptaráðherra, hafi fyrst frétt af því að Gunnari hafi verið sagt upp í fjölmiðlum. „Ráðuneytið hefur bara verið upplýst um það ferli sem hefur verið í gangi af hálfu stjórnar, en þetta er alfarið hennar mál. Fjármálaeftirlitið er sjálfstætt í sínum störfum. Það er sérstaklega kveðið á um það, að það er sérstök ríkisstofnun með sérstakri stjórn,“ sagði Steingrímur í viðtali á Stöð 2 í kvöld.

Aðspurður um álit sitt á þeirri ákvörðun að segja forstjóra Fjármálaeftirlitsins upp í miðju uppgjöri á bankahruni segir Steingrímur að það sé mikilvægt að það ríki fullt traust inná við og útávið í starfsemi Fjármálaeftirlitsins „Það er eitt mikilvægasta verkefni stjórnarinnar að tryggja að svo sé, þannig að hún verður að fara með þau mál eins og hún telur að sé réttast. Það er hennar hlutverk, þannig að við blöndum okkur ekki í það,“ segir Steingrímur.