Segir bréf Jóns Ásgeirs alvarlegt

Forseti Alþingis segir að bréf sem lögfræðingur Jóns Ásgeirs Jóhannessonar, stjórnarformaður 365 hf, sendi Ágústi Ólafi Ágústssyni, formanni viðskiptanefndar, í gær sé í alla staði óvenjulegt.

Í bréfinu er farið fram á að Ágúst Ólafur kalli forsvarsmenn ríkisbankanna þriggja ekki á fund viðskiptanefndar á morgun. Láti hann ekki af kröfunni muni Jón Ásgeir leggja fram kæru.

Ágúst Ólafur sagði í samtali við Vísi í gær að málið lúti að áhyggjum þingheims af því hvort hér á landi sé að myndast einokun á fjölmiðlamarkaði og hvort ríkisbankarnir hafi átt þátt í því. Það sé síðan bankanna að meta hvort bankaleynd sé fyrir hendi í þessu tilviki eða ekki.

,,Bréfið er mjög alvarlegt og ég veit ekki til þess að það séu nokkur fordæmi fyrir því að þingmenn hafi fengið slíka tilkynningu," segir Sturla Böðvarsson, forseti Alþingis.

Sturla segir að það skipti afar miklu máli að þingmenn hafi frelsi til að afhafna sig í störfum þingnefnda og fái að spyrja þeira spurninga sem þeir telja nauðsynlegt að spyrja.

Séu einstaklingar ósáttir og telja á sér brotið geta þeir sömu leitað réttar síns fyrir dómstólum, að sögn Sturlu. Ísland sé réttarríki.