Rökrétt niðurstaða að mati Viðskiptaráðs

„Við fyrstu sýn sjáum við ekki betur en að þetta sé rökrétt niðurstaða en þrátt fyrir það geta einstakir skilmálar verið brot á íslenskum lögum og því þurfa dómstólar hér að skera úr um það. Auk þess er seinna málið fyrir EFTA-dómstólnum óafgreitt en þar geta lán sem voru veitt með greiðsluáætlunum sem gerðu ráð fyrir engri verðbólgu, verið dæmd ólögmæt,“ segir Björn Brynjúlfur Björnsson, hagfræðingur Viðskiptaráðs Íslands, um niðurstöðu EFTA-dómstólsins. 

Í morgun kynnti dómstóllinn niðurstöðu sína um að tilskipun Evrópusambandsins um neytendalán leggi ekki almennt bann við skilmálum um verðtryggingu neytendalána í samningum milli veitenda og neytenda. Dómstóllin segir þar að það sé íslenskra dómstóla að taka afstöðu til skilmála verðtryggingarinnar og hvort hún sú óréttmæt.

„Það er mikilvægt að málinu ljúki hjá Hæstarétti sem fyrst því umfang skuldabréfamarkaðarins hérlendis er gríðarlegt. Hann er í kringum ein landsframleiðsla og þar af eru þrír fjórðu verðtryggðir. Við leggjum því mikla áherslu á að það komi endanleg niðurstaða í þetta fyrir íslenskum dómstólum,“ segir Björn og heldur áfram:

„En okkur fannst þetta vera í takt við málavexti og finnst í rauninni jákvætt að það sé ekki tekið fyrir hendurnar á okkur og að við höfum sjálfdæmi í þessu máli."

Seinna málið sem Björn vísar til varðar mál sem Sævar Jón Gunnarsson höfðaði gegn Landsbankanum vegna 630 þúsunda króna verðtryggðs láns. Í því er spurt um réttmæti þess að miða við 0 prósent verðbólgu í lánasamningum og mun EFTA-dómstólinn gefa ráðgefandi álit sitt í málinu síðar í haust.