Ritstjórar sýknaðir af tíu milljón króna miskakröfu

Ritstjórar Fréttablaðsins, þeir Jón Kaldal og Þorsteinn Pálsson voru í dag sýknaðir í meiðyrðamáli sem Hjalti "Úrsus" Árnason höfðaði gegn þeim fyrir ummæli sem féllu um hann í grein í blaðinu. Hjalti krafðist tíu milljóna í miskabætur auk þess sem hann vildi að ákveðin ummæli sem honum tengdust yrðu dæmd dauð og ómerk. Dómarinn var hins vegar á þeirri skoðun að ummælin væru innan marka tjáningarfrelsisins og sýknaði hann því ritstjórana.

„Helstu atvik máls þessa má rekja til þess að haldið var aukaþing í Kraftlyftingasambandi Íslands, KRAFT, 5. október 2007 og var á dagskrá fundarins aðild KRAFT að IPF eða WPF. Jóhanna Eiríksdóttir, þáverandi formaður KRAFT setti þingið en síðan tók Jakob Baldursson við og kynnti WPF (World powerlifting federation) og þær reglur sem það félag hefur sett sér, m.a. varðandi lyfjapróf. Fóru fram umræður á fundinum og kemur fram í fundargerð frá fundinum að menn hafi velt fyrir sér hvort kosning um aðild að WPF fæli í sér breytingu á lögum KRAFT. Ekki fór fram kosning á fundinum um það hvort KRAFT skyldi sækja um aðild að WPF," segir í dómnum.

Hjalti var á fundinum, en fram kom í málinu að hann situr ekki í stjórn félagsins.

„Á ritstjórn Fréttablaðsins barst ábending 7. október 2007 um að Jóhanna Eiríksdóttir hefði í kjölfar fundarins sagt af sér formennsku í KRAFT og mátti ráða af framburði hennar fyrir dómi að hún hefði óskað eftir því að félagið tæki afgerandi afstöðu til þess hvort félagið væri hlynnt lyfjaprófum eða ekki, en gætt hefði tvískinnungs innan KRAFT varðandi notkun á lyfjum í íþróttinni hér á landi, að því er segir í dómnum," segir einnig.

„Í frétt Fréttablaðsins, sem ber yfirskriftina: Kraftlyftingamenn sem vilja ekki lyfjapróf þröngvuðu formanni sínum frá völdum, og birtist 8. október á bls. 2, segir að Jóhanna hafi sagt af sér formennsku í Kraftlyftingasambandi Íslands," segir í málsskjölum.

„Þá segir orðrétt í fréttinni: Hún segir að sér hafi verið þröngvað út úr stjórninni vegna þess að hún vildi að kraftlyftingamenn sæktust eftir aðild að Íþrótta-og Ólympíusambandi Íslands. Ekki hafi verið vilji fyrir því meðal áhrifamanna í sambandinu vegna þess að því myndu fylgja regluleg lyfjapróf. Þá er haft orðrétt eftir Jóhönnu: ,,Stjórnin fylgdi ekki formanninum að málum og þá hefur skipstjórinn ekkert að gera í brúnni lengur ... Þeir eru ekki mikið fyrir breytingar þarna og í raun eru tveir menn sem stjórna eiginlega öllu". Segir síðan í fréttinni að þar eigi Jóhanna við þá Auðun Jónsson og stefnanda máls þessa, en jafnframt segir í fréttinni að hvorugur þeirra sitji í stjórn sambandsins."

Þessu vildi Hjalti ekki una og krafðist hann þess að ummælin yrðu dæmd dauð og ómerk auk þess sem hann krafði ritstjórana um tíu milljón krónur í miskabætur.

„Jóhanna Eiríksdóttir kvað Hjalta ekki hafa verið félagsmann í KRAFT á þeim tíma þegar fundur var haldinn í Kraftlyftingasambandi Íslands. Hún kvaðst alls ekki hafa verið að vísa til stefnanda með þeim ummælum sem eftir eru henni höfð í margnefndri frétt, hann hafi ekki verið félagsmaður í KRAFT á þessum tíma og því ekki haft atkvæðisrétt. Varðandi þau ummæli sem eftir eru henni höfð, að stefnandi og Auðunn Jónsson hafi stjórnað öllu í félaginu, kvað vitnið það hafa verið sína skoðun," segir í dómsuppsögunni.

Dómari komst að þeirri niðurstöðu að ummælin væru innan marka tjáningarfrelsisins og voru ritstjórarnir því sýknaðir.