Reykvíkingar niðurgreiða skólavist fyrir börn úr nágrenninu

Reykvíkingar niðurgreiða nám fyrir nemendur í Ísaksskóla úr öðrum sveitarfélögum, segir Dagur B. Eggertsson, formaður borgarráðs. Reykjavíkurborg greiðir mun hærra framlag með hverjum nemanda á aldrinum 6-9 ára í skólanum en önnur sveitarfélög. Samkvæmt upplýsingum Vísis nemur framlagið frá Reykjavík um 930 þúsundum króna á ári en framlög frá öðrum sveitarfélögum nema um 441 þúsund krónum. Hlutfall nemenda í skólanum utan Reykjavíkur er 25%. „Þetta er auðvitað óeðlilegt. Við höfum verið að tala máli þessa skóla við nágrannasveitarfélögin en þetta er ekki sanngjarnt," segir Dagur.

Samþykkt var í borgarráði í gær að Reykjavíkurborg myndi kaupa húsnæði Ísaksskóla af skólanum. Skólastarfið sjálft verður hins vegar rekið með sama formi og áður. Formaður borgarráðs segir að skólinn hafi verið í fjárþröng og þetta hafi verið góð leið til að leysa úr þeim málum. Til standi að skólinn kaupi húsnæðið aftur á sama verði eftir fimm ár.


Einsetning grunnskóla var sumum skólum erfið
„Fyrst og fremst erum við náttúrlega að tryggja skólastarf í næstu viku. Það á að hefjast í næstu viku og það gengur ekki að stefna því í hættu með engum fyrirvara," segir Dagur. Hann telur að skólinn hafi verið í fjárþröng um nokkurt skeið. Lagfæringar sem þurfi að gera á skólahúsnæðinu hafi síðan verið dropinn sem fyllti mælinn þegar ákvörðun um að kaupa húsnæðið var tekin í gær. „Það má eiginlega segja að þessir skólagjaldaskólar hafi átt í erfiðleikum frá einsetningu skólans. Vegna þess að áður voru þessir skóla tvísetnir og jafnvel þrísetnir," segir Dagur og bendir á að þannig hafi skólinn átt hægara um vik með að afla sér meiri tekna.

Dagur tekur skýrt fram að núverandi skólastjórnendur og forysta skólans hafi verið að taka á rekstri hans að undanförnu og hafi lagt fram rekstraráætlanir til næstu ára sem sýni frammá að rekstur skólans geti gengið upp.