Enski boltinn

Redknapp bókaði Eið Smára í leik á Sky Sports á Instagram

Eiður Smári er enn án liðs, en verður í sjónvarpinu á laugardaginn.
Eiður Smári er enn án liðs, en verður í sjónvarpinu á laugardaginn. vísir/getty
Eiður Smári Guðjohnsen verður einn af sérfræðingum Sky Sports á leik Everton og Chelsea á laugardaginn, en hann verður í myndveri í London og fer yfir leikinn ásamt Jamie Redknapp og fleirum.

Redknapp, sem hefur starfað sem sérfræðingur Sky Sports í mörg ár, fékk Eið Smára til að mæta á laugardaginn í gegnum samtal þeirra á Instagram-síðu íslenska landsliðsmannsins.

Eftir að Eiður Smári setti inn gamla mynd af föður sínum Arnóri Guðjohnsen í treyju Anderlecht og óskaði honum til hamingju með afmælið hófust samræður þeirra.

JR: „Goðsagnarkennd mynd, hvernig hefurðu það?“

ESG: „Ég er góður, en þú?“

JR: „Já, Eiður. Hver er stefnan hjá þér á þessari leiktíð? Ætlarðu að vera eitthvað aðeins í sjónvarpinu með mér?“

ESG: „Ekki viss á þessari stundu, en alltaf klár í sjónvarpið með þér, Jamie.“

JR: „Láttu mig vita þar sem við erum með nokkra Chelsea-leiki á fyrstu vikum deildarinnar. Væri gott að fá þig til að tala um Jose og fleira.“

JR: „Laugardagurinn 30. ágúst; vera í myndveri í London yfir leik Everton og Chelsea. Koma svo.“

ESG: „Já, ég er klár.“

JR: „Frábært. Hringi í þig varðandi flug.“

Eiður Smári hefur áður verið í myndveri Sky Sports, meðal annars á stórleik Barcelona og Chelsea í Meistaradeildinni fyrir nokkrum árum, en hann hefur fengið mikið lof fyrir frammistöðu sína í sjónvarpi.

Hann er enn án liðs eftir að hann samdi ekki aftur við Club Brügge í lok síðasta tímabils. Magnús Agnar Magnússon, umboðsmaður hans, sagði við Fréttablaðið í síðasta mánuði að nokkur lið hefðu haft samband og væru áhugasöm um að fá Eið í sínar raðir.

Samtal Jamie Redknapps og Eiðs Smára.mynd/skjáskot



Fleiri fréttir

Sjá meira


×