Páll Óskar í gervi krumma

Páll Óskar heldur Halloween-ball á Rúbín í Öskjuhlíð á laugardagskvöldið. Hann tjaldar öllu sem til er í skreytingum en ekki síður í búningum. Hann mun ljúka kvöldinu sem sótsvartur krummi.

Allir eiga sér eitthvert annað sjálf. Ég er sjálfur samanskrúfaður úr mörgum karakterum, er bæði kona og maður, köttur og hrafn, súperhetja og trúður. Á hrekkjavökunni nota ég tækifærið til að fá útrás fyrir þessa hlið á mér,“ segir Páll Óskar Hjálmtýsson sem stendur fyrir Halloween-balli um helgina.

„Dags daglega er ég ofsalega jarðbundinn í klæðavali, jafnvel þurr og leiðinlegur í jogginggalla. En, þegar sjóið byrjar umturnast ég algerlega og legg gríðarlega vinnu í það,“ segir Páll Óskar sem veit engin böll skemmtilegri en hrekkjavöku- og Eurovisionböll.

Undirbúningurinn fyrir ballið er mikill og ekki síst líkamlegur og andlegur en Páll Óskar er á leiðinni í tveggja tíma nudd og nálastungur þegar blaðamaður hefur uppi á honum. „Ég þarf að liðka líkamann til enda er það strangt ferli þegar stórar helgar eru fram undan. Það gengur ekki að hoppa upp á svið í óspurðum fréttum,“ segir hann og hlær. „Við vorum byrjuð að skreyta á þriðjudaginn og erum að umbreyta Rúbín í vampírukastala.“

Tónlistarmaðurinn á langa helgi fram undan því hann mun standa fyrir einkahrekkjavökupartíi á föstudagskvöldið og svo tekur við pásulaus skemmtidagskrá á Rúbín frá ellefu til fjögur um nóttina á laugardaginn. Einn búningur nægir ekki fyrir slíkt maraþonkvöld.

„Ég verð í þremur búningum. Byrja sem glamúrgaur með kórónu, lepp, handaskraut og axlarskart úr semelíusteinum sem var hannað sérstaklega fyrir mig. Í þessu þeyti ég skífum þar til ég er orðinn mjúkur eins og smjör. Þegar ég stíg á svið breytist ég í Pál Óskar og bæði ég og dansararnir verðum klæddir silfri frá toppi til táar. Þegar sjóinu lýkur er ég orðinn gegnumblautur og skipti því um búning og lýk kvöldinu sem hrafn,“ lýsir Páll Óskar en vinur hans, Kókó Viktorsson, á heiðurinn að krummajakkafötunum sem hann klæðist á myndinni og eru alsett svörtum fjöðrum. 

„Það er ekki krafa að vera í búningi á ballinu en það er miklu skemmtilegra. Svo verðum við líka með förðunardömur á staðnum sem geta hresst upp á sminkið,“ segir hann glettinn.