Bíó og sjónvarp

Óskarsverðlaunahafi gerir Benjamín dúfu

Adda Soffía Ingvarsdóttir skrifar
Úr myndinni Benjamín dúfa, eftir sögu Friðriks Erlingssonar.
Úr myndinni Benjamín dúfa, eftir sögu Friðriks Erlingssonar.
„Ég er alveg rosalega spenntur fyrir þessu og það er mjög þýðingarmikið fyrir myndina að fá framleiðanda Boyhood með okkur í lið,“ segir Erlingur Jack Guðmundsson, einn framleiðenda bandarískrar endurgerðar á myndinni Benjamín dúfa. „Hún las handritið að myndinni og heillaðist gjörsamlega af sögunni, fannst hún raunveruleg og einstaklega hjartnæm.“

Með honum vinna einnig framleiðendurnir Cathleen Sutherland Óskarsverðlaunahafi og Susan Kirr, sem framleiddi kvikmyndina The Tree of Life. „Ég er búinn að vinna þetta með Kirr og leikstjóranum og handritshöfundinum Brandon Dickerson. Þeim fannst vanta einn framleiðanda í viðbót og þannig kom Sutherland inn í þetta verkefni,“ segir Erlingur.

Erlingur Jack Guðmundsson, einn framleiðendanna, segir mikinn feng að fá framleiðanda Boyhood.vísir/ernir
Það eru komin þrjú ár síðan hann bar það undir höfund bókarinnar, Friðrik Erlingsson, að gera bandaríska útgáfu af myndinni. „Í gegnum sambönd sem ég hef þá kynntist ég Kirr, og plataði hana til þess að lesa bókina. Hún gerði það og fannst hún auðvitað svo frábær að hún gat ekki með nokkru móti lagt hana frá sér.“

Til stendur að hefja tökur á myndinni í ágúst, en prufur fyrir helstu hlutverkin eru á lokastigi. Hann segir mjög líklegt að einhver þekkt nöfn verði í aukahlutverkum í myndinni, en getur ekki gefið það upp að svo stöddu. „Sá sem er að aðstoða okkur við að finna stráka í aðalhlutverkin var „casting director“ í myndinni No Country for Old Men. Eins og er þá erum við að skoða um fimmtán stráka sem koma til greina í aðalhlutverkin,“ segir hann.

Myndin verður tekin upp í Texas, og mun henni svipa mjög til íslensku útgáfunnar, sem fagnar tuttugu ára afmæli sínu í ár.






Fleiri fréttir

Sjá meira


×