Ölvaður túristi stal póstbíl á Leifsstöð

Póstbíl var stolið þar sem hann stóð í gangi fyrir utan Flugstöð Leifs Eiríkssonar á laugardagsmorguninn síðastliðinn. Í tilkynningu frá lögreglu segir að bílstjórinn hafi brugðið sér inn í Leifsstöð með dagblöð og þegar hann kom til baka var bíllinn horfinn.

Skömmu áður hafði lögreglu verið tilkynnt um leigubílstjóra sem væri í vanda við Leifsstöð þar sem erlendur farþegi hefði tekið bílinn úr miðbæ Reykjavíkur en neitaði að greiða farið þegar komið var í Leifsstöð. Hefði hann verið mjög ölvaður.

„Lögregla þurfti ekki lengi að svipast um eftir póstbílnum áður en hann fannst fastur í skafli skammt frá flugstöðinni. Við stýrið sat maður, sem reyndist við nánari athugun vera, erlendur ferðalangur, sá hinn sami og hafði tekið leigubílinn að Leifsstöð nokkru áður og neitað að greiða fargjaldið." Kalla þurfti eftir aðstoð til þess að ná bílnum úr skaflinum.

„Ferðalangurinn erlendi var handtekinn og færður á lögreglustöð þar sem hann var yfirheyrður."