Innlent

Ölfus þarf ekki að afhenda gögn

sveinn arnarsson skrifar
Íslenska gámafélagið hefur í um eitt ár reynt að fá afhent gögn um útboð Ölfuss á sorphirðu.
Íslenska gámafélagið hefur í um eitt ár reynt að fá afhent gögn um útboð Ölfuss á sorphirðu. Fréttablaðið/Heiða
Kröfu Íslenska gámafélagsins um að fá afhent gögn vegna útboðs um sorphirðu í Ölfusi í lok árs 2013 var hafnað í Héraðsdómi Suðurlands fyrir helgi.

Taldi dómurinn ekki geta tekið afstöðu þar sem einkamál hefði verið höfðað í Héraðsdómi Reykjavíkur milli beggja aðila og Gámaþjónustunnar. Bendir dómurinn á að þegar mál hafi verið þingfest verði dóms ekki krafist um þær kröfur sem eru gerðar í því í öðru máli. Það er álit dómsins að raunverulega sé um að tefla sama sakarefni í báðum málum og því ekki hægt að taka efnislega afstöðu í málinu að þessu sinni.

Forsaga málsins er sú að árið 2013 fór fram útboð á sorphirðu sveitarfélagsins. Þrjú fyrirtæki skiluðu tilboðum í sorphirðuna og átti Gámaþjónustan lægsta tilboðið. Gámaþjónustan fékk þar af leiðandi verkið til ársins 2019.

Íslenska gámafélagið óskaði eftir því að fá afhent gögn um tilboð Gámaþjónustunnar til að glöggva sig á tilboðinu. Sveitarfélagið neitaði að afhenda þau gögn.

Íslenska gámafélagið skaut málinu til úrskurðarnefndar um upplýsingamál og vildi fá afhent téð gögn. Úrskurðarnefndin komst að þeirri niðurstöðu að sveitarfélaginu bæri að afhenda gögnin.

Enn neitaði sveitarfélagið að veita fyrirtæki í samkeppni við Gámaþjónustuna upplýsingar um tilboðsgerð hennar. Því hefur verið höfðað mál til þess að fá úr þessu skorið fyrir dómstólum.

Lögfræðingar Sambands íslenskra sveitarfélaga og samtaka iðnaðarins hafa sagt það mikilvægt að upplýsingar sem þessar skuli ekki afhentar samkeppnisaðila. Það myndi grafa undan fyrirkomulagi útboða hins opinbera.




Fleiri fréttir

Sjá meira


×