Ók viljandi á rútu með þrjú börn sín í bílnum

Kona og þrjú börn hennar létu lífið í árekstri bíls og strætisvagns í Finnlandi á sunnudagskvöld. Konan ók bílnum með þrjú börn sín innanborðs en ökumaður strætisvagnsins var eiginmaður hennar. Svo virðist sem móðirin hafi ekið bíl sínum viljandi á strætisvagninn.

Að sögn lögreglu í Finnlandi munu hjónin hafi rifist heifarlega skömmu fyrir áreksturinn. Lögreglumaðurinn Heikki Mansikka-aho, sem fer fyrir rannsókn málsins, segir föður barnanna hafa farið strætisvagninum til vinnu og ók móðirin á eftir honum með börnin þrjú um borð.

Mansikka-aho segir konuna svo hafa stöðvað bílinn og farið um borð í strætisvagninn þar sem þau rifust heifarlega. Maðurinn bað þá konuna um að yfirgefa rútuna og fór hún aftur í bílinn og hélt förinni áfram, sömu leið og strætisvagninn. „Á einhverjum tímapunkti sneri hún svo bílnum við og klessir bílnum framan á strætisvagninn. Bílinn var á miklum hraða,“ sagði Mansikka-aho á fréttamannafundi í gær.

Konan lést í árekstrinum ásamt eins árs gömlum strák og tveimur stúlkum, tveggja og sex ára gömlum.

Enginn í rútunni slasaðist alvarlega. Í frétt Dagens Nyheter kemur fram að lögregla hafi enn ekki tekist að yfirheyra manninn þar sem hann sé enn í áfalli vegna atburðarins.

Áreksturinn átti sér stað á þjóðvegi 74 í borginni Rautavaara í Nyrðri-Savolax, um 100 kílómetrum norður af Kuopio.