Óhreinu börnin á Íslandi

Það er leitað skýringa á því, sem enginn virðist skilja, hvers vegna fjórflokkarnir með fylgiflokknum tapa miklu fylgi.

Það virðist enginn vilja vita af óhreinu börnunum hennar Evu: Einstaklingum sem misstu heimili sín, öryrkjum sem lifa ekki af örorkubótum, um 40 prósentum af eldri borgurum sem lifa ekki af skömmtuðum tekjutengdum lífeyri langt undir framfærslu, eldri borgurum í húsnæðissamvinnufélögum, sem fengu enga leiðréttingu og urðu jafnvel fyrir ólöglegri eignaupptöku, og fjölda yngra fólks með námsskuldir, án skuldaleiðréttingar og húsnæðisskuldir án leiðréttingar, ef foreldrar veittu ábyrgð lána og þeim einnig, sem geta ekki stofnað heimili, því þau hafa ekki greiðslugetu til að fá lán eftir reglum bankanna, en mega í þess stað borga húsaleigu langt umfram afborgun af lánum vegna íbúðarkaupa, sem þau ættu að geta keypt.

Fyrri ríkisstjórn skerti kjör öryrkja og eldri borgara miskunnarlaust og kom á þessum tekjutengingum og skerðingum, þannig að eldri borgarar, sem voru ekki starfsmenn ríkisins á nær verðtryggðum lífeyri, fengu nær engar tekjur úr sínum lífeyrissjóðum. Ríkisstjórnin lofaði breytingum á almannatryggingalöggjöfinni snemma á valdatíma sínum og lagði loks fram frumvarp á síðustu dögum þingsins, sem dagaði uppi.

Núverandi ríkisstjórn hefur nær engu breytt í þessum málum frá fyrri ríkisstjórn. Breytingar á almannatryggingunum enn í nefnd, rökum eldri borgara, einkum Björgvins Guðmundssonar um kjaraskerðingar, ekki svarað, heldur sagt að aldrei hafi verið greitt meira!

Á flokksþingi Framsóknarflokksins 2013 var samþykkt að kjaraskerðing aldraðra og öryrkja, sem tók gildi 1. júlí 2009, yrði afturkölluð og að lífeyrir aldraðra og öryrkja yrði hækkaður vegna kjaraskerðingar þeirra eftir hrun. Á landsfundi Sjálfstæðisflokksins 2013 var samþykkt að sú kjaraskerðing, sem eldri borgarar og öryrkjar urðu fyrir 1. júlí 2009, yrði tafarlaust afturkölluð og að leiðrétta ætti kjaragliðnun krepputímans. Í kosningabréfi fyrir kosningar var sagt: „Við ætlum að afnema tekjutengingu ellilífeyris.“

Hnífnum snúið í sárinu

Ekki var staðið við neitt af þessu, heldur er hnífnum snúið í sárinu núna: Nauðungaruppboð halda áfram og launahækkanir þessa árs eiga ekki að ná til óhreinu barnanna á þessu ári, en þau eiga að borga allar hækkanir á leigugjöldum, þjónustugjöldum og sjúkragjöldum allt frá hruni til þessa dags óbætt, og unga fólkið á að lifa við verðtryggðar skuldir og ofurvexti, sem aldrei verður hægt að komast frá. Hver vill búa við þessar aðstæður? Hvað skyldu vera margir, sem hafa ekki efni á að leita sér læknis eða hafa ekkert sér til bjargar þegar líður á mánuðinn?

Óhreinu börnin á Íslandi, þeir sem eru gjaldþrota eða eignalausir, öryrkjar, eldri borgarar með ónýta lífeyrissjóði og hlunnfarið ungt fólk, á engan annan kost en hefja nýja hagsmunabaráttu, meðal annars með stofnun stjórnmálaflokks, sem lofar leiðréttingu komist sá flokkur til áhrifa, með það heit hvers frambjóðanda, að standa við það loforð.