Óblíðar móttökur fyrir nýaðflutta Hornfirðinga

Tveir menn hafa lagt fram kæru á Höfn í Hornafirði á hendur hópi unglingspilta vegna ofbeldisárásar aðfaranótt síðastliðins laugardags. Fréttastofa útvarps greindi frá þessu í kvöld. Mennirnir tveir eru nýfluttir til Hornafjarðar og segir lögreglan það því miður ekki einsdæmi að nýbakaðir Hornfirðingar fái óblíðar móttökur á nýja staðnum.

10 unglingspiltar réðust að mönnunum tveimur með höggum og spörkum og voru mennirnir illa marðir og með glóðaraugu, en þó óbrotnir. Þeir yngstu í hópi árásarmannanna eru 16 ára en aðrir eru komnir yfir tvítugt. Að sögn RÚV er þetta ekki í fyrsta skipti sem lögreglan þarf að hafa afskipti af þessum tiltekna unglingahópi.

Auk lögreglu mun félagsmálastjóri sveitarfélagsins láta til sín taka í málinu.