Nýherji hagnast um 12 milljónir

Hagnaður Nýherja á þriðja ársfjórðungi nam 12 milljónum króna en fyrirtækið var rekið með um 100 milljóna tapi á sama tíma í fyrra.

Um 137 milljóna króna hagnaður var af rekstri Nýherja á fyrstu níu mánuðum ársins samanborið við rúmlega 1.100 milljóna tap á sama tímabili 2013. Finnur Oddsson, forstjóri upplýsingatæknifyrirtækisins, segir afkomuna á þriðja ársfjórðungi undir væntingum en að reksturinn á fyrstu níu mánuðum ársins sé á áætlun.

„Ágætur gangur var í rekstri móðurfélags Nýherja, á þriðja ársfjórðungi. Sala á tölvu- og tæknibúnaði var í heild yfir áætlun. Sala á Lenovo tölvum hefur vaxið töluvert síðustu misseri en tæplega tíu þúsund tölvur hafa verið seldar til fyrirtækja og einstaklinga það sem af er ári. Tekjur TM Software vaxa enn verulega á milli ára, einkum vegna mikils vaxtar í sölu á Tempo hugbúnaði sem nú stendur á bak við 44% af veltu félagsins," segir Finnur í afkomutilkynningu Nýherja.