Lykilkraftar útrásar orkugeira sameinast

Félögin Reykjavik Energy Invest og Geysir Green Energy hafa verið sameinuð undir nafni þess fyrrnefnda. Eignir sameinaðs félags nema 65 milljörðum króna og heildarhlutafé 40 milljarðar. Starfsmönnum Orkuveitunnar býðst að kaupa hlut í félaginu á genginu 1,3. Félagið á að skrá á markað innan tveggja ára.

Stjórnir Reykjavík Energy Invest (REI) og Geysis Green Energy hafa undirritað samkomulag um sameiningu félaganna undir merkjum hins fyrrnefnda. Heildarverðmæti félagsins eftir sameiningu nemur um 65 milljörðum króna. Stærstu eigendur eru Orkuveita Reykjavíkur með 35,5 prósent, FL Group með 27 prósent og Atorka Group með fimmtungshlut.

Forsvarsmenn félagsins segja að við sameininguna verði til leiðandi fyrirtæki á heimsvísu í fjárfestingum og þróun á sviði jarðvarma.
Stjórnarformaður félagsins verður Bjarni Ármannsson og forstjórar félagsins verða Guðmundur Þóroddsson og Ásgeir Margeirs­son. Á verkefnalista REI er bygging og kaup um 700 megawatta raforkuvinnslu sem nær meðal annars til Bandaríkjanna, Filippseyja, Grikklands, Indónesíu, Þýskalands og Eþíópíu, en framtíðarmarkmið félagsins er að framleiða þrjú til fjögur þúsund megavött fyrir lok árs 2009.

„Þetta eru mjög metnaðarfull markmið sem leiða munu til þess að til verður langstærsta orku­fyrirtæki heims á sviði jarðvarma," segir Hannes Smárason, forstjóri FL Group, og telur að með sameiningu þessara tveggja lykilkrafta íslenskrar orkuútrásar sé kominn öflugur vettvangur til enn frekari vaxtar. „Þarna eru auknir möguleikar á dreifðara tekjustreymi frá hinum ýmsu sviðum. En auðvitað snýst þetta aðallega um verkefnin sem fyrir dyrum standa," segir hann og telur mikið svigrúm til verðmætaaukningar á næstu árum. „En auðvitað þarf að vinna vel úr spilunum. Samkeppni er einhver, en við teljum okkur geta náð leiðandi stöðu," segir hann og kveður stefnt að skráningu félagsins á markað jafnskjótt og auðið er. „Því ferli hröðum við töluvert með því að sameina félögin því reksturinn er þá strax frá fyrsta degi umfangsmeiri en ella."

Bjarni Ármannsson, sem staddur var í Gíneu Bissá í gær, segir stefnt að markaðsskráningu vorið 2009. „Saman eru þessi félög með mörg fjárfestingaverkefni í farvatninu og ná saman að stækka hraða og ná meiri áhættudreifingu. Þá hafa þau meira mannafl og fjármagn til að sækja fram. Það mun hraða bæði fjárfestingu og skráningu frá því sem annars hefði orðið."