Lögreglumenn vilja verkfallsrétt

Landssamband lögreglumanna vill að lögreglumenn fái verkfallsrétt aftur. Tillaga þess efnis var lögð fram á síðasta fundi lögreglumanna með viðsemjendum sínum. Þetta staðfestir Snorri Magnússon, formaður Landssambandsins, í samtali við fréttastofu.

„Þær kröfur sem við höfum haft í frammi og erum búnir að hafa í frammi síðan 2008 eru enn á borðinu. Það er ljóst að þær hafa engan hljómgrunn í því efnahagsástandi sem er núna. Því er ekki að leyna að við erum reiðubúnir til þess að setja þær kröfur á ís þar til betur árar í samfélaginu gegn því að við fáum samningsréttinn aftur," segir Snorri.

Snorri segir annars að staðan í samningaviðræðunum sé óbreytt. „Það er ekkert að gerast í þessu, bara alls ekki neitt," segir Snorri.

Lögreglumenn krefjast ríflega hundrað þúsund króna hækkun á launum nýútskrifaðra lögreglumanna.