Lögreglan leitar ökufants

Lögreglan leitar nú ökumanns BMW bifreiðar sem ók utan í vegrið við Arnarnesbrúna laust eftir klukkan ellefu í morgun. Ökumaðurinn yfirgaf vettvang eftir óhappið og ekki er vitað hvað varð um hann. Lögreglan telur sig þó vita hver hann er.

Á svipuðum stað ók ökumaður Toyota Corolla bifreiðar út af og segir lögreglan að ökumaður hafi verið heppinn að lenda ekki ofan í Kópavogslæknum. Sá ökumaður var í annarlegu ástandi, líklegast eftir neyslu áfengis eða fíkniefna.

Lögreglan telur það vera mikla mildi að enginn slasaðist í þessum umferðaróhöppum, en BMW bifreiðin fór utan í vegrið sem kom í veg fyrir að hann færi á öfugan vegarhelming.