Líklegt að kynjahlutfall verði jafnt í ríkisstjórn

Líklegt er að ráðherraembætti muni skiptast jafnt milli Samfylkingar og Vinstri grænna í nýrri ríkisstjórn og að ráðherrum verði fækkað úr tólf í átta. Þá er útlit fyrir að í fyrsta skipti í sögunni verði jafnt kynjahlutfall í ríkisstjórninni. Til greina kemur að sérfræðingar utan þings taki sæti í ríkisstjórninni.

Samkvæmt heimildum fréttastofu hafa Vinstri grænir lagt fram hugmyndir um að ráðherrum verði fækkað úr því að vera 12 í 8. Í stórum dráttum heldur Samfylkingin þeim ráðuneytum sem hún hefur veitt forstöðu í fráfarandi ríkisstjórn. Skipting ráðuneyta á milli flokka er jafnan ákveðin á síðustu stundu og liggur því ekki fyrir, en samkvæmt heimildum fréttastofu lítur listinn svona út:

Jóhanna Sigurðardóttir verði forsætisráðherra, en um það mun ríkja sátt. Ingibjörg Sólrún Gísladóttir yrði áfram formlega utanríkisráðherra, en fer í leyfi og myndi Össur Skarphéðinsson þá taka að sér verkefni ráðuneytisins í hennar fjarveru.

Össur myndi jafnframt verða nokkurs konar atvinnumálaráðherra og undir hann myndu heyra iðnaðar-, viðskipta-, landbúnaðar-, og sjávarútvegsráðuneytin. Þó er nokkuð óljóst með viðskiptaráðuneytið, en hugmyndir eru um að það verði gert öflugra en það er nú. Í embætti dómsmálaráðherra myndi veljast Lúðvík Bergvinsson.

Vinstri grænir fengju fjármálaráðuneytið og myndi Steingrímur J. Sigfússon, formaður flokksins, verða fjármálaráðherra, Ögmundur Jónasson er talinn líklegur til að verða ráðherra í heilbrigðis- og félagsmálaráðuneyti, Katrín Jakobsdóttir er sögð koma til greina sem menntamálráðherra og Kolbrún Halldórsdóttir myndi fara í umhverfisráðneytið.

Þá ríkir nokkur óvissa undir hvaða ráðherra Samgönguráðuneytið lendir. Þá hefur það einnig verið í umræðunni að aðilar utan þings taki sæti í ríkisstjórn. Ólafur Ragnar Grímsson, forseti Íslands, staðfesti þetta í dag.