Kynlífssvelti er óspennandi vopn
Sigga Dögg kynlífsfræðingur.
Mér leikur forvitni á að vita hvort það sé til afmælisgjöf fyrir frúna sem kryddar upp á kynlífið sem má samt opna fyrir framan tengdaforeldrana á afmælisdaginn?
Svar:
Nú eru góð ráð dýr! Eru tengdaforeldrarnir húmoristar og sæju kímnina í einum ílöngum titrara?
Ef þig langar í rafknúið tæki þá eru komin á markaðinn mjög smartir titrarar sem líkjast penum nuddtækjum (enda er titrari nuddtæki!). Vinsælasti titrarinn er frá Hitachi og hann var ekki hannaður sem kynlífstól heldur sem herða- og baknuddstæki svo það mætti gjarnan fjárfesta í honum án þess að særa blygðunarkennd viðstaddra. Þá má láta fylgja með lífræna kókosolíu sem má nota innvortis sem útvortis svo hún er góð nuddolía og sleipiefni.
Í rauninni má sjá tvöfalt notagildi í mörgum hlutum. Þannig geta fallegir kertastjakar skapað rómantíska stemningu inni í svefnherbergi. Þú gætir einnig keypt kynlífstæknibók og skipt um bókakápu við settlegri bók svo grunsemdir yrðu að engu. Gjafabréf á hótel gæti einnig verið kjörið því það eitt að breyta um umhverfi getur blásið lífi í loftlaust samlíf. Munúðarfullar gjafir geta einnig verið kynæsandi líkt og fínt kampavín og eðal konfektmolar.
Þá gæti verið sniðugt að láta skriflegar leiðbeiningar fylgja með pakkanum, til dæmis í fallegu korti og þannig má í raun gera hvaða gjöf sem er að kynlífskryddi. Ekki væri verra að láta inneignarmiða í kelerí fylgja með. Leyfðu ímyndunaraflinu að leika lausum hala og hafðu frumlegheitin í fyrirrúmi!
Spurning:
Kanntu gott ráð til að plata kærasta með þér í allsherjarhreingerningu? Má hóta kynlífssvelti? Kærasti minn er bara svo agalega latur og það virðist ekkert duga til að fá hann í stórhreingerningu, matarinnkaup eða annað sem þarf að gera fyrir heimilið.
Svar:
Hér játa ég vanmátt minn því ég þoli ekki þrif og allra síst þrif með metnaði. Ég er þó fylgjandi því að pör hafi verkaskiptingu með heimilisþrifin og þar skuli gæta jafnræðis. Skýr verkaskipting getur dregið verulega úr óþarfa rifrildum.
Á mínu heimili sé ég um þvott, matarinnkaup og eldamennsku. Tilfallandi viðbótarþrif má svo semja sérstaklega um. Þetta er því ekki spurning um að „plata" makann enda er sú nálgun á samskipti innan sambands ekki vænleg. Útskýrðu fyrir viðkomandi af hverju þátttaka hans á heimilinu sé þér mikilvæg. Þetta er ekki spurning um að „nenna" heldur að þið eruð í sambandi og báðir aðilar þurfa að sjá um ákveðna hluti og það er bara þannig, ekkert múður og mas með það.
Kynlífssvelti er undarlegt hugtak enda gefur það til kynna að einn aðili ráði yfir kynlífi sambandsins og kjósi að svelta hinn hungraða og það er ekki spennandi lýsing á samlífi pars. Komdu kærastanum frekar í skilning um að þegar þú ert ánægð í hjartanu (sem þú verður þegar hann tekur virkan þátt í þrifum) þá leiðir sú ánægja niður í píku og enginn þarf að kvarta undan neinu.
Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir.
Mest lesið: Umræðan
Nýjast á Vísi
Fréttablaðið
Stöð2
- Ísland í dag
- Kvöldfréttir
- Veðurfréttir
- Sími 512 5000
- Hafðu samband
- Starfsfólk
- Umferð
- Veftré
- Auglýsingar
- 365 Skaftahlíð 24 105 Reykjavík Sími: 512 5000