Keflvíkingar sjálfum sér verstir

Nýliðar Keflavíkur byrjuðu leik í Landsbankadeild karla af miklum krafti og liðið sat í toppsæti deildarinnar eftir fyrstu þrjár umferðirnar með sjö stig. Síðan þá hefur sigið á ógæfuhliðina hjá liðinu sem hefur aðeins fengið þrjú stig út úr síðustu fimm leikjum og þau stig komu í hús í ósannfærandi í 1-0 sigri á Víkingum á heimavelli 7. júní. Keflavík hefur síðan þá tapað þremur leikjum í röð með markatölunni 2-9 og fyrir vikið er liðið á hraðri leið niður stigatölfuna og stefna í harðan heim fallbaráttunnar áður en langt um líður. Það finnst mörgum sem hafa séð til hins unga og efnilega Keflavíkurliðs að Keflvíkingar séu sjálfum sér verstir. Þeir eru hættir að spila sinn skemmtilega bolta, boltinn fær ekki að ganga lengur og þeir virðast vera búnir að missa allt sjálfstraust í sínum aðgerðum - bæði í vörn og sókn. En það er ekki bara það sem gerir þeim lífið leitt því liðið hefur nú skorað sjálfsmark í þremur leikjum í röð. Ólafi Ívari Jónssyni var það á að skora sjálfsmörk bæði gegn ÍBV út í Vestmannaeyjum sem og gegn Skagamönnum á heimavelli og í fyrrakvöld skoraði síðan Sreten Djurovic sjálfsmark gegn nágrönnunum í Grindavík. Keflvíkingar hafa þannig skorað fleiri mörk í sitt eigið mark en þau sem þeir hafa skorað í mark andstæðingann í þessum þremur tapleikjum. Þetta er í fyrsta sinn sem lið skorar sjálfsmark í þremur leikjum í röð í tíu liða efstu deild en Keflvíkingar jöfnuðu einnig met Skallagrímsmanna (1997), Víkinga (1993) og Eyjamanna (2003) yfir flest sjálfsmörk eins liðs á einu tímabili og þeir eiga tíu leiki eftir á tímabilinu til að eignast það met einir. Það vekur líka athygli að níu leikmenn hafa skorað níu mörk Keflavíkurliðsins í sumar, átta Keflavíkingar og einn FH-ingur en Tommy Nielsen skoraði sjálfsmark í viðureign liðanna í þriðju umferð. Tveir bættust í hópinn í gær þegar þeir Sreten Djurovic og Zoran Daníel Ljubicic opnuðu þá markareikning sinn í sumar en Jónas Sævarsson, Hólmar Örn Rúnarsson, Stefán Gíslason, Scott Ramsey, Hörður Sveinsson og Þórarinn Kristjánsson eru einnig með eitt mark á bakinu í Landsbankadeild karla í sumar. Flest sjálfsmörk eins liðs á tímabili: 3 Víkingur 1993  3 Skallagrímur 1997  3 ÍBV 2003  3 Keflavík 2004