Innlent

Kæfandi myglulykt angrar borgarbúa

Samúel Karl Ólason skrifar
Stór hluti Klambratúns liggur undir klaka.
Stór hluti Klambratúns liggur undir klaka. Vísir/Daníel
Borgarbúar hafa kvartað sáran undan myglulykt sem víða hefur fundist í Reykjavík. Um er að ræða lykt vegna kalskemmda á grasi sem hefur legið undir klaka um tíð. Stillt hefur verið í veðri síðustu daga og því hefur lyktin legið yfir stórum svæðum.

„Þetta er tilkomið vegna kalskemmda á grasi. Það er klaki yfir stórum svæðum og lyktin kemur þaðan undan. Skýringin á því að menn eru að tala um þetta núna er kannski sú að í dag og í gær hefur verið svolítið stillt veður. Þannig hefur lyktin ekki fokið í burtu og safnast aðeins fyrir. Það hjálpar ef það hreyfir vind," segir Þórólfur Jónsson, garðyrkjustjóri Reykjavíkur.

Þórólfur segir þessar aðstæður ekki koma oft upp í Reykjavík. „Þetta eru aðstæður sem eru kannski svolítið sérstakar núna. Þó þetta hljóti nú að hafa gerst áður hér í Reykjavík man ég ekki eftir því undanfarin ár.“

Klakinn getur verið mjög þykkur og segir Þórólfur lítið vera um lausnir og hætt er við að tún í borginni skemmist.

„Við fengum klaka ofan í auða jörð fyrst svo enginn hiti er í henni. Síðan er veðrið búið að dansa í kringum frostmarkið og þiðna upp og frjósa aftur, svo klakinn er orðinn mjög þéttur. Við gætum horft fram á einhvern skaða ef við fáum ekki hláku bráðum. Það er ekki víst að við séum komin þangað, en það er hætta á því og hún eykst eftir því sem þetta dregst lengur.“

„Við erum ekki með neinar lausnir við þessu, aðrar en að leggjast á bæn. Þetta er meira og minna um alla borg og þó við ættum einhver tæki sem mögulega virka, hef ég ekki trú á að það myndi gagnast svo raunhæft væri. Ég held að við eigum frekar að horfa á hvernig bregðast á við þessu þegar grasið kemur undan klakanum.“




Fleiri fréttir

Sjá meira


×