Viðskipti innlent

Icesave-skuldin fer líklega ekki yfir 75 milljarða

Þorbjörn Þórðarson skrifar
Már Guðmundsson, seðlabankastjóri, sagði á ráðstefnu KPMG í gær að Icesave-skuldin yrði líklega aldrei hærri en sem nemur 5% af landsframleiðslu. Það eru 75 milljarðar króna.
Már Guðmundsson, seðlabankastjóri, sagði á ráðstefnu KPMG í gær að Icesave-skuldin yrði líklega aldrei hærri en sem nemur 5% af landsframleiðslu. Það eru 75 milljarðar króna.

Nýjustu upplýsingar benda til að heildarupphæð sem ríkissjóður þarf að greiða vegna Icesave-reikninga Landsbankans verði 5 prósent af landsframleiðslunni eða 75 milljarðar króna. Þetta kom fram í máli seðlabankastjóra í gær. Engir samningar hafa enn litið dagsins ljós.

Tafir á lausn Icesave-málsins hafa stöðvað erlenda fjárfestingu hér á landi og tafið fyrir aðkomu ríkissjóðs að alþjóðlegum skuldabréfamörkuðum. Steingrímur J. Sigfússon, fjármálaráðherra, sagði í viðtali við Ísland í dag í síðustu viku að stutt væri í að niðurstaða yrði kynnt í viðræðum við Breta og Hollendinga.

Steingrímur sagðist vonast til þess að málið myndi skýrast mjög fljótt. Unnið væri að málinu upp á hvern dag. „Við erum alltaf að vonast til þess að nú fari menn að klára það sem út af stendur þannig að hægt verði að fara að kynna þá niðurstöðu," sagði Steingrímur, en engin niðurstaða hefur þó verið kynnt. Ekki náðist í Steingrím í morgun, en Huginn Freyr Þorsteinsson, aðstoðarmaður hans sagði í samtali við fréttastofu að viðræður stæðu enn yfir.

Greint hefur verið frá þeirri afstöðu Breta og Hollendinga að þeir leggi á það áherslu að samningarnir verði studdir af meirihluta Alþingis áður en þeir verði lagðir fyrir afgreiðslu þess. Huginn Freyr sagði að þetta væri að hluta til rétt, þar sem Bretar og Hollendingar hefðu lagt áherslu á breiða samstöðu um þann samning sem verði gerður.

Már Guðmundsson, seðlabankastjóri, sagði á haustráðstefnu KPMG í gær að nýjustu upplýsingar bentu til þess að sú upphæð sem ríkissjóður þyrfti að greiða vegna Icesave-reikninganna yrði að öllum líkindum umtalsvert lægri en áður hefur verið talið. „Samkvæmt nýjustu vísbendingum þá bendir flest til þess að Icesave-skuldin verði hugsanlega vel innan við 5 prósent af landsframleiðslu," sagði Már.

Verg landsframleiðsla var 1.500 milljarðar króna á síðasta ári samkvæmt tölfræði Hagstofunnar. Fimm prósent af því eru 75 milljarðar króna, en síðasta tilboð sem Bretar og Hollendingar gerðu hljóðaði upp á 110 milljarða króna eingreiðslu sem greiða ætti fyrir svokallað vaxtafrí samninganna fram til 1. janúar 2012. Eftir þann tíma ættu eignir Landsbankans að ganga upp í höfuðstól Icesave og vextir byrja að reiknast ofan á það sem eftir stæði. Þeir myndu verða 2,5 prósent til 3,5 prósent álag ofan á LIBOR-vexti og leggjast ofan á lánið á árunum 2012 til 2016 þegar lokauppgjör færi fram. Ef heildarkostnaðurinn verður 75 milljarðar króna er því ljóst að um umtalsvert betri niðurstöðu er að ræða en áður hefur verið talið.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×