Í lagi fyrir skuldara að breyta myntkörfulánum

Þeir sem tekið hafa gengistryggð lán munu ekki missa rétt sinn vegna aðgerða stjórnvalda gegn skuldavanda heimilanna. Þar á meðal er niðurfærsla fjármögnunar-fyrirtækja á bílalánum.

Eins og fram kom í Fréttablaðinu um helgina kynnti Árni Páll Árnason félagsmálaráðherra forsvarsmönnum fjármögnunarfyrirtækjanna fjögurra hugmyndir ráðuneytisins um aðgerðir gegn skuldavanda.

Hugmyndirnar eru enn í vinnslu og verða kynntar síðar, að því er fram kemur í tilkynningu frá ráðuneytinu í gær.

Héraðsdómur Reykjavíkur komst að þeirri niðurstöðu fyrir mánuði að lán tengd erlendum gjaldmiðli væru ólögmæt. Málinu hefur verið áfrýjað til Hæstaréttar. Björn Þorri Viktorsson lögmaður varaði þá fólk við að breyta erlendum gengislánum sínum í krónur á þeim forsendum að það kunni að verða af hugsanlegri höfuðstólslækkun.

„Aðgerðir stjórnvalda nú breyta í engu þeim ágreiningi og munu aldrei verða til að taka betri rétt af lánþegum sem tekið hafa lán, fari svo að dómstólar komist að niðurstöðu í samræmi við kröfur lánþega. Óþarfi er því að óttast að fyrirhugaðar aðgerðir stjórnvalda hafi neikvæð áhrif á réttarstöðu skuldara,“ segir í tilkynningunni.

- jab