Húnaþing vestra mun kæra veiðimenn án leyfis

Húnaþing vestra áformar að selja rjúpnaveiðileyfi á lönd í eigu sveitarfélagsins á yfirstandandi rjúpnaveiðitímabili.

Forsætisráðuneytið hefur úrskurðað að sveitarfélaginu sé óheimilt að selja rjúpnaveiðileyfi á þjóðlendur í sveitarfélaginu.

Guðný Hrund Karlsdóttir sveitarstjóri segir fyrirkomulag rjúpnaveiða nú í samræmi við úrskurðinn. „Við bjóðum nú aðeins veiðileyfi á lönd í eigu sveitarfélagsins og undanskiljum þau almenningnum. Þetta er í samræmi við úrskurðinn. Allir með gilt veiðikort og skotvopnaleyfi geta keypt veiðileyfi hjá okkur og fá kort af svæðunum,“ segir Guðný Hrund.

Fjöldi verður takmarkaður við fjórar byssur í löndum sveitarfélagsins og er vænst til þess að veiðimenn virði fyrirkomulagið.

Guðný segir öllum heimilt að fara á þjóðlendur innan sveitarfélagsins en veiði á eignarlandi er háð leyfi. „Þeir veiðimenn sem munu veiða á okkar landareignum án leyfis verða kærðir umsvifalaust til lögreglu og gildir einu hvort þeir hafi veitt á svæðinu áður,“ segir Guðný Hrund.

Fréttin birtist fyrst í Fréttablaðinu