Gylfi fer aftur að kenna

Gylfi Magnússon, fráfarandi efnahags- og viðskiptaráðherra, gerir ráð fyrir að hann snúi aftur til kennslustarfa hjá Háskóla Íslands nú þegar að hann hefur látið af störfum ráðherra. „Ég á ekki von á öðru en að snúa aftur upp í Háskóla. Ég er í launalausu leyfi þar. Ég er nú reyndar ekki búinn að tala við samstarfsmenn mína þar en það er ekkert annað í kortunum," segir Gylfi.

Gylfi segist vera ágætlega sáttur við að stíga upp úr stóli ráðherra við þessi tímamót. Það séu þó ýmis verkefni sem hann hefði viljað vinna áfram að. „Það er alltaf þannig að það eru einhver verkefni sem maður hefði viljað fylgja eftir lengra, auðvitað efnahagsáætlunin sem slík og lagabreytingar og annað," segir Gylfi. Það komi samt alltaf maður í manns stað þannig að það komi í hlut annarra að fylgja verkefnunum eftir.

„Ég bara hverf sáttur og sæll úr þessu starfi og er bara ánægður með það að snúa aftur til minna fyrri starfa," segir Gylfi að lokum.