Gálga stolið af sprengjulistamanni

„Hann virðist hafa verið tekinn í sundur og fjarlægður," segir listamaðurinn Þórarinn Jónsson en fjögurra metra hár gálgi sem stóð á Daníelslippi er horfinn. Gálginn var listaverk og tilheyrði sýningunni „Slipp my mind". Sjö aðrir listamenn sýndu einnig verk sín á sýningunni. Þau verk fengu að standa í friði.

„Þegar ég kom niður á höfn á mánudaginn þá var verkið horfið," segir Þórarinn en sýningin opnaði síðasta laugardag. Verkið fékk því að standa óhreyft í tæpa tvo sólarhringa.

Aðspurður segist Þórarinn ekki hafa hugmynd um það hvað varð af verkinu. Hann bað sýningastjórann um að spyrjast eftir því en sú leit hefur engum árangri skilað.

En Þórarinn grunar starfsmenn við höfnina um græsku: „Ég held að þetta hafi bara farið fyrir brjóstið á einhverjum hafnarverkamönnum og þeir því tekið sig til og rifið verkið í sundur með kúbeini og þar með gefið sitt álit á verkinu."

Þórarinn segist ekki kippa sér upp við þjófnaðinn sem hann líkir við að stela málverki af listasýningu.

Frá opnun sýningarinnar Slipp my mind. Þess má geta að sýningin stendur enn yfir þrátt fyrir gálgamissinn.

„Ég er eiginlega orðinn vanur þessu," segir Þórarinn en listsköpun hans varð til þess að hann var handtekinn í Kanada fyrir um tveimur árum síðan. Þá bjó hann til sprengjulistaverk. Verkið skildi hann eftir á opinberum vettvangi í Toronto, þar sem hann stundaði nám, og á verkinu stóðu eftirfarandi skilaboð: This is not a bomb.

Engu að síður mætti sprengjusveit lögreglunnar á vettvang. Og í kjölfarið var Þórarinn handtekinn. Hann þurfti að dúsa í tvo daga í fangelsi áður en honum var svo sleppt. Síðar var hann sektaður fyrir athæfið auk þess sem hann var rekinn úr listaháskólanum.

Þórarinn segir það versta við gálgaþjófnaðinn að hann fékk ekki tækifærið til þess að taka almennilegar myndir af honum.

Spurður hvort hann ætli að kæra þjófnaðinn segist Þórarinn ekki hafa gert það upp við sig.

„Annars er gaman að fá viðbrögð við listaverkunum sem maður gerir, hvort sem þau eru góð eða slæm," segir Þórarinn að lokum.

Hafi einhver upplýsingar um afdrif verksins er sá sami beðinn um að hafa samband við Vísi með því að senda póst á frettir@stod2.is