Innlent

Ráðast í undir­búning að­gerða eftir tíu daga náist ekki samningar

Bjarki Sigurðsson skrifar
Kristján Þórður Snæbjarnarson er formaður RSÍ.
Kristján Þórður Snæbjarnarson er formaður RSÍ. Vísir/Egill

Samninganefndir Fagfélaganna, Matvís, Rafiðnaðarsambandsins (RSÍ) og Félags vélstjóra og málmtæknimanna (VM), hafa gefið fulltrúum sínum við samningaborðið tíu daga til að ná saman við Samtök atvinnulífsins (SA) um nýjan kjarasamning. Takist það ekki munu nefndirnar hefja undirbúning aðgerða.

Í tilkynningu á vef VM segir að þetta hafi verið niðurstaða hitafundar nefndanna í hádeginu í dag. Þar kynnti Benóný Harðarson, forstöðumaður kjaradeildar Fagfélaganna, stöðu mála.

„Að kynningu lokinni tóku við líflegar umræður, sem fóru langt fram úr tímaáætlun. Ljóst er af þeim umræðum að þolinmæði fyrir árangurslitlum samtölum við samningaborðið í húsakynnum ríkissáttasemjara er á þrotum. Bent var á að mánuðir séu liðnir frá því samtalið hófst,“ segir í tilkynningunni. 

Samninganefndirnar hafa boðað til annars fundar föstudaginn 23. febrúar og verði þá ekki útlit fyrir að samningar takist þá helgi, leggja þær á ráðin um undirbúning aðgerða til að knýja á um nýjan samning. 

Félögin funduðu síðast með SA hjá ríkissáttasemjara í gær og í dag, án árangurs.

Kjaramál Kjaraviðræður 2023-24
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið