Mætti án þess að æfa með nýja liðinu sínu og leiddi það til sigurs

Dobbs leiddi þá lið Minnesota Vikings til 31-28 sigurs á móti Atlanta Falcons á útivelli. Það voru þó ekki beint úrslitin eða tölfræði Dobbs sem stálu fyrirsögnunum þrátt fyrir að hann hafi spilað mjög vel og unnið leikinn.

Það sem gerði þetta afrek hans svona merkilegt var undirbúningur hans fyrir leikinn. Hann var enginn.

Dobbs var nýkominn til Víkinganna eftir að aðalleikstjórnandi liðsins, Kirk Cousins, meiddist illa um síðustu helgi. Dobbs kom til Minnesota í neyðarleikmannaskiptum við Arizona Cardinals á þriðjudaginn síðasta.

Hann átti ekki að spila þennan leik í gær því nýliðinn Jaren Hall byrjaði. Hall fékk hins vegar heilahristing í fyrsta leikhluta og gat ekki haldið leik áfram. Dobbs var því hent út í djúpu laugina í eina erfiðustu stöðu sem fyrirfinnst í íþróttum.

Hann hafði aldrei spilað með liðinu og aldrei spilað með liðsfélögum sínum á æfingu. Hann hafði aldrei kastað á neinn af útherjum liðsins. Hann þekkti ekki einu sinni nöfnin á mörgum liðsfélaga sinna.

Dobbs lenti líka í vandræðum í byrjun en kom sér í gegnum það og fór upp nær allan völlinn í lokin þegar Víkingarnir tryggðu sér sigurinn. Hann átti síðan snertimarkssendingu á Brandon Powell þegar 22 sekúndur voru eftir sem tryggði liðinu sigurinn. Stuttu áður hafði Dobbs haldið sókninni á lífi með því að hlaupa 22 jarda með boltann á fjórðu tilraun.

„Í þessari deild þá er aldrei ástæða til að afsaka sig með kringumstæðum. Ég lærði það af Mike Tomlin [þjálfari Pittsburgh Steelers]. Vanalega er fólki sama um kringumstæðurnar þínar. Þau vilja bara sjá þig ná árangri í þeim kringumstæðum sem þú lendir í,“ sagði Joshua Dobbs. Hann gaf tvær snertimarkssendingar í leiknum og hljóp alls 66 jarda með boltann.

Af öðrum úrslitum má nefna að Kansas City Chiefs vann 21-14 sigur á Miami Dolphins í Þýskalandi þar sem meistararnir komust í 21-0. Philadelphia Eagles er með besta árangurinn í deildinni eftir 28-23 sigur á Dallas Cowboys en Ernirnir hafa unnið átta af níu leikjum sínum.

Baltimore Ravens sýndi styrk sinn með 37-3 sigri á Seattle Seahawks og Cincinnati Bengals er komið á beinu brautina en 24-18 sigur þess á Buffalo Bills var fjórði sigurleikurinn í röð.

CJ Stroud, nýliði Houston Texans, átti einnig frábæran dag í gær. Hann setti nýtt met með því að kasta fyrir 470 jördum í leiknum og slá þar með nýliðamet Andrew Luck. Stroud átti alls fimm snertimarkssendingar í dramatískum 39-37 sigri á Tampa Bay Buccaneers.