Leicester og Totten­ham unnu sína riðla en tap hjá Ís­lendinga­liðinu

Tottenham vann 2-0 sigur á Royal Antwerp og vann þar af leiðandi J-riðilinn. Staðan var markalaus í hálfleik en Vinicius kom Tottenham yfir á 57. mínútu.

Stundarfjórðungi síðar tvöfaldaði Giovani Lo Celso muninn og þar við sat. Tottenham vinnur riðilinn með þrettán stig af átján mögulegum en Antwerp endar í 2. sætinu með tólf stig.

Leicester endaði einnig í efsta sætinu í sínum riðli en þeir unnu G-riðilinn eftir 2-0 sigur á AEK Aþenu á heimavelli í kvöld. Cengiz Under og Harvey Barnes skoruðu mörkin með tveggja mínútna millibili í fyrri hálfleik, á 12. og 14. mínútu.

Arnór Sigurðsson spilaði allan leikinn er CSKA Moskva tapaði 3-1 fyrir Dinamo Zagreb á útivelli. Hörður Björgvin Magnússon var ekki með CSKA sem endar í fjórða og síðasta sæti K-riðilsins.

Jens Petter Hauge heldur áfram að gera það gott fyrir AC Milan eftir að hafa komið til félagsins frá Alfons Sampsted og félögum í Bodo/Glimt. Hann skoraði eina markið í 1-0 sigrinum á Sparta Prague sem tryggði AC efsta sætið í H-riðlinum.