Lífið

Bretar furða sig á byssuleysinu í Ófærð

Þórarinn Þórarinsson skrifar
Sigríður Pétursdóttir kvikmyndakona hitti tvær enskar konur á förnum vegi í London og eftir stutt spjall um Ófærð lögðu konurnar tvær fram skýlausa kröfu um að þriðja sería þáttanna gerist að sumri til.
Sigríður Pétursdóttir kvikmyndakona hitti tvær enskar konur á förnum vegi í London og eftir stutt spjall um Ófærð lögðu konurnar tvær fram skýlausa kröfu um að þriðja sería þáttanna gerist að sumri til. Fréttablaðið/Ernir
Breskir aðdáendur Ófærðar 2 önduðu léttar á laugardagskvöld þegar BBC4 sýndi tvo síðustu þættina í einum rykk. Sigríður Pétursdóttir býr í London þar sem hún hefur fundið fyrir miklum áhuga á þáttunum og Íslandi. „Ég hef fengið alls konar skemmtileg viðbrögð,“ segir Sigríður í samtali við Fréttablaðið.

„Einna skemmtilegast fannst mér þegar ég var í Kenwood House um daginn að mynda stórt og fallegt magnólíutré. Þar voru tvær dömur í sömu erindagjörðum og eftir að við vorum búnar að tala aðeins um hvað þetta væri fallegt, sagði ég þeim að ég fengi ekki nóg af þessum trjám á vorin því á Íslandi væru engin slík.“

Þegar konurnar áttuðu sig á því að Sigríður væri íslensk barst talið snarlega að „Trapped“ eins og þættirnir heita á ensku. „Þær spurðu um myrkrið og veðrið og hvenær best væri að ferðast til Íslands,“ segir Sigríður. „Ég sagði þeim frá miðnætursólinni, þegar sólin sigldi á haffletinum og færi svo upp aftur. Þeim fannst það hrikalega spennandi, að það væri bjart allan sólarhringinn.“

Í ljósi þessarar nýfengnu vitneskju sögðust konurnar tvær endilega vilja að þriðja sería Ófærðar gerist að sumarlagi. „Svo Bretar myndu fá að kynnast þeirri hlið á Íslandi líka. Ég þekki helling af fólki sem fór til Íslands vegna þáttanna og líka vegna Game of Thrones.“

Andri og Hendrika heilla

Fyrsta Ófærðarserían féll vel í kramið þegar hún var sýnd í Bretlandi 2016 og þá var það ekki síst Ólafur Darri Ólafsson í hlutverki bangsalegu löggunnar Andra sem heillaði og festi sér fjölda aðdáenda sem hafa fylgst spenntir með þessum nýjustu hremmingum hans.

„Þegar fyrri serían var í gangi voru stelpurnar sem voru með mér í dansi alveg að tapa sér yfir Darra. Hann varð að miklu kyntákni hérna og ég spældi þær ógurlega með því að segja þeim að hann væri vel giftur og pabbi í ofanálag. Þær bara neituðu að trúa því.

En það var ekki bara Darri sem átti hug fólks og ég man eftir eldri dömu sem sagði að hana langaði helst að ættleiða Hinriku,“ segir Sigríður um lögreglustjórann sem Ilmur Kristjánsdóttir leikur. „Hún þyrfti á góðu faðmlagi að halda. Hér voru líka gerðar könnur með myndum af þeim og ég held þær hafi bara selst vel.“



Lög og regla

Þá, eins og nú, byrjaði fólk umsvifalaust að ræða um Ófærð þegar það áttaði sig á þjóðerni Sigríðar. „Um leið og maður sagðist vera Íslendingur, eða einhver vissi að maður væri það, byrjaði fólk að tala um „Trapped“ og byrjaði stundum inni í miðjum söguþræði svo ég náði stundum ekki fyrst um hvað þau voru að tala.“

Og vitaskuld, eins og á Íslandi, var veðrið helsta umræðuefnið. „Þá vildu flestir tala um veðrið og hvort það væri virkilega svona á Íslandi. Þá sagði ég þeim að ég væri sjálf að norðan, frá litlum stað svipuðum Siglufirði, og mataði þau á sögum af því þegar við komumst ekki í skólann vegna ófærðar og þurftum að elda á prímusum því það var rafmagnslaust. Þetta var mjög vinsælt.“

Ólafur Darri og Ilmur hafa heillað Breta í hlutverkum Andra og Hinriku.
Ófærðarþættirnir hafa einnig vakið forvitni og spurningar um lögregluna á Íslandi. „Margir vildu vita hvort lögreglan væri virkilega svona vinaleg auk þess sem hún hefur verið spurð nokkuð út í hið sérkennilega orð „lögreglan“. Hvað það þýði eiginlega?

„Og þá útskýri ég það og þá er spurt hvernig lögreglurnar okkar geti haldið uppi lögum og reglu þótt þær séu ekki einu sinni með byssur.“ Þetta sætir furðu en þykir að vonum ósköp krúttlegt. Svo mjög reyndar að „þegar maður reynir að leiðrétta og segja að á Íslandi sé víst spilling og alls ekki allt fullkomið þá vilja sumir ekki einu sinni heyra það“.

Eftirspurn meiri en framboð

„Á milli þáttaraða hef ég svo ekki tölu á öllum þeim sem spurðu mig hvenær næsta þáttaröð kæmi og hvort það væri ekki til meira efni frá Íslandi. Ég er sannfærð um að við gætum dælt þáttum í þá ef meiri fjármunir væru lagðir í gerð sjónvarpsefnis en margir urðu mjög þakklátir þegar ég sagði þeim frá öðru íslensku efni sem hægt væri að nálgast.“

Sigríður er annáluð bíókona og stjórnaði meðal annars á sínum tíma kvikmyndaþáttunum Kviku á Rás 1. Hún hefur búið í London í nokkur ár og hefur að sjálfsögðu verið með hugann við kvikmyndir.

„Ég hef verið að skrifa. Búin að ljúka við eitt kvikmyndahandrit en kalla mig ekki handritshöfund fyrr en þegar eða ef það verður að mynd,“ segir Ófærðarsendiherra Íslands í London sem missti af tvöföldum lokaþættinum á laugardaginn og þarf að forðast forvitna Breta þangað til úr því verður bætt.






Fleiri fréttir

Sjá meira


×