Kynningar

Utanríkisráðherra: „Við getum verið stolt af okkar starfi“

Heimsljós kynnir
Utanríkisráðherra í vinnuheimsókn sinni í Malaví
Utanríkisráðherra í vinnuheimsókn sinni í Malaví GSal

Guðlaugur Þór Þórðarson utanríkisráðherra fór um verkefnasvæði íslenskrar þróunarsamvinnu í gær á öðrum degi heimsóknar sinnar til Malaví. „Það er einstök upplifun að sjá með eigin augum hversu miklu framlag Íslendinga hefur skilað. Ég hitti meðal annars skólabörn, mæður og nýbura sem hafa notið góðs af okkar stuðningi. Við getum verið stolt af okkar starfi,“ sagði utanríkisráðherra eftir að hafa séð árangur af þróunarsamvinnu Íslands á þremur sviðum grunnþjónustu við íbúa Mangochi héraðs, í menntun, lýðheilsu og vatns- og hreinlætismálum. 

Íslensk stjórnvöld hafa frá árinu 2012 einbeitt sér að stuðningi við eitt fátækasta héraðið í Malaví og lagt héraðsstjórninni til fjármagn til að sinna grunnþjónustu við íbúana, sem eru rúmlega þrefalt fleiri en allir Íslendingar, eða um 1,2 milljónir. Á síðasta ári nam stuðningurinn rúmlega 600 milljónum íslenskra króna. Til lýðheilsu og uppbyggingar fæðingar- og ungbarnaþjónustu veittu Íslendingar um 160 milljónir á síðasta ári til héraðsstjórnarinnar. Í héraðinu öllu fæðast rúmlega sex sinnum fleiri börn en á Íslandi, eða á bilinu 25 til 30 þúsund. 

Utanríkisráðherra heimsótti glænýja fæðingardeild í Kadongo, í afskekktri sveit þar sem líka er nýbyggt biðskýli fyrir verðandi mæður langt að komnar, og starfsmannahús. Fæðingardeildin í Kodongo er ein af níu slíkum fæðingardeildum í sveitum Mangochi sem hafa verið reistar á síðustu misserum, sex þeirra hafa þegar verið teknar í notkun en þrjár verða opnaðar síðar á árinu. Malaví er meðal þeirra þjóða í Afríku sem náð hefur einna lengst í lækkun mæðra- og ungbarnadauða og þáttur Íslendinga í þeim árangri er óumdeildur að mati heimamanna. Á fáeinum árum hefur til dæmis tekist að útrýma að mestu fæðingum úti í sveitunum með ómenntuðum yfirsetukonum og þorri barnshafandi kvenna sækir öruggari þjónustu á fæðingardeildirnar. 

Tólf grunnskólar njóta stuðnings Íslendinga í Mangochi, Milimba skólinn er einn þeirra og utanríkisráðherra var vel fagnað í gær við komu sína. Í þessum tólf skólum eru fleiri nemendur en í öllum grunnskólum Reykjavíkur. Öllum börnum er kennt í kennslustofum með skólaborðum og stólum en í þessum skóla sat þorri nemenda á jörðinni flötum beinum í skugga trjánna fyrir fáeinum misserum. Í menntaverkefninu er líka lögð þung áhersla á þjálfun kennara og betri námsárangur. Í grennd við Milimba skólann skoðaði Guðlaugur Þór eitt af nokkur hundruð vatnsbólum sem reist hafa verið fyrir íslenskt þróunarfé. Rúmlega 300 þúsund íbúar Malaví hafa fengið aðgang að hreinu neysluvatni í grennd við heimili sín frá því Íslendingar hófu þróunarsamvinnu í Malaví fyrir þremur áratugum. Við vatnsbólið var ráðherranum fagnað með söng og dansi eins og víðar í ferðinni.

Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.