Viðskipti erlent

Tesla sparkar 3000 starfsmönnum

Stefán Ó. Jónsson skrifar
Elon Musk, stofnandi Tesla, bindur miklar vonir við Model 3-bíla fyrirtækisins.
Elon Musk, stofnandi Tesla, bindur miklar vonir við Model 3-bíla fyrirtækisins. Getty/Troy Harvey
Rafbílaframleiðandinn Tesla segist þurfa að fækka starfsfólki fyrirtækisins um 7 prósent. Um 45 þúsund manns starfa hjá Tesla og því má áætla að fækka muni um 3000 í starfsliðinu.

Í tölvupósti til starfsmanna, sem nálgast má á vefsíðu Tesla, segir stofnandi þess að þrátt fyrir ágætis vöxt fyrirtækisins séu erfiðir tímar framundan. Síðastliðið ár hafi þó líklega verið það besta í sögu Tesla og nefnir í því samhengi að fyrirtækið hafi afhent nánast jafnmarga rafbíla árið 2018 en öll fyrri ár samanlagt. Fyrsti bíll fyrirtækisins, Roadster, rataði á göturnar árið 2008.

Engu að síður séu rafbílar Tesla ennþá of dýrir fyrir flest, venjulegt fólk og hagnaðurinn af hverjum seldum bíl lítill. Elon Musk, stofnandi Tesla, er þó ekki af baki dottinn.

Sjá einnig: Sérfræðingar gagnrýna smíðagæði Tesla Model 3

„Á þessum ársfjórðungi munum við vonandi sjá; með herkjum, dugnaði og smá heppni, örlítinn hagnað,“ skrifar Musk. Hann bætir við að frá og með maí næstkomandi verði fyrirtækið þó að fara afhenda hina svokölluðu miðútgáfu af Model 3-bifreiðinni á öllum mörkuðum. Að sama skapi verði Tesla að keppast við að ná til viðskiptavina sem til þessa hafa ekki haft efni á að kaupa bifreiðar fyrirtækisins. Það verði aðeins gert með því að hanna og framleiða ódýrari útgáfur af Model 3.

Í ljósi vendinga síðustu missera, sem orsökuðu það sem Musk kallar „mest krefjandi ár“ í sögu Tesla, verði fyrirtækið að grípa til uppsagna. Nefnir hann sérstaklega í því samhengi að fækka starfsfólki í fullu starfi og að halda aðeins eftir „mikilvægustu“ hlutastarfsmönnum og verktökum.

Þrátt fyrir uppsagnirnar verði Tesla að hraða framleiðslu Model 3-bílanna, sem og að gera fjölmargar framleiðsluaukandi breytingar á næstu mánuðum.


Tengdar fréttir

Elon Musk stígur til hliðar sem stjórnarformaður Tesla

Elon Musk mun stíga til hliðar sem stjórnarformaður Tesla fyrirtækisins. Hann verður þó forstjóri fyrirtækisins áfram. Fjármálaeftirlit Bandaríkjanna hefur sektað Tesla fyrirtækið um 20 milljónir Bandaríkjadala og Elon Musk um sömu upphæð.






Fleiri fréttir

Sjá meira


×