Körfubolti

Stjörnur LeBron og Curry skinu skært | Myndbönd

Tómas Þór Þórðarson skrifar
LeBron James var frábær í fjórða leikhluta.
LeBron James var frábær í fjórða leikhluta. vísir/getty

Golden State Warriors vann auðveldan sigur á Cleveland Cavaliers, 129-105, í NBA-deildinni í körfubolta í nótt en þetta eru liðin sem að mættust í lokaúrslitunum í júní. Mikið er breytt hjá Cleveland sem hefur ekki lengur nokkuð að gera í Golden State.

Steph Curry fór hamförum fyrir meistarana og skoraði 42 stig, tók níu fráköst og gaf sjö stoðsendingar en hann hitti úr ellefu af 20 skotum sínum í leiknum, þar af níu af fjórtán þrettán stiga skotum sínum.

Kevin Durant bætti við 25 stigum, tíu fráköstum og níu stoðsendingum og daðraði við glæsilega þrennu en Klay Thompson skoraði svo 16 stig fyrir meistarana í þessum örugga sigri.

Golden State er nú búið að vinna tvo leiki í röð og 17 í heildina en liðið er í fjórða sæti vestursins á eftir Denver, OKC og LA Clippers.

Maðurinn sem að yfirgaf Cleveland, LeBron James, átti einnig stórleik í nótt þegar að LA vann tiltölulega öruggan heimasigur á San Antonio Spurs, 121-113.

LeBron skoraði 42 stig, þar af 20 í fjórða leikhluta þar sem að hann tryggði heimamönnum sigurinn eftir að Spurs hafði sótt í sig veðrið í þriðja leikhluta.

DeMar DeRozan skoraði 32 stig fyrir Spurs og Rudy Gay 31 en þetta mikla stórveldi má muna sinn fífil fegurri. Liðið er í næst neðsta sæti vestursins með ellefu sigra eins og Houston Rockets en Phoenix Suns er allra liða verst með aðeins fjóra sigra.


Paul George var svo maðurinn í naumum 114-112 sigri Oklahoma City gegn Brooklyn en hann skoraði 47 stig, þar af 25 í ótrúlegum fjórða leikhluta. Hann skoraði þriggja stiga körfu sem kom gestunum yfir þegar að 3,1 sekúnda var eftir af leiknum.

Brooklyn var mest 23 stigum yfir en með George í stuði kom OKC til baka og vann leikinn en liðið heldur áfram í toppbaráttu vesturdeildarinnar.

Russell Westbrook nældi sér í 108. þrennuna á ferlinum og komst þannig yfir Jaston Kidd, fyrrverandi NBA-meistara og þjálfara, á þrennulistanum en Westbrook skoraði 21 stig, tók 15 fráköst og gaf 17 stoðsendinga.



Úrslit næturinnar:

Cleveland Cavaliers - Golden State Warroprs 105-129
Orlando Magic - Denver Nuggets 118-124
Atlanta Hawks - Washington Wizards 117-131
Brooklyn Nets - OKC Thunder 112-114
Toronto Raptors - Philadelphia 76ers 113-102
Memphis Grizzlies - LA Clippers 96-86
Milwaukee Bucks - Detroit Pistons 115-92
Minnesota Timberwolves - Charlotte Hornets 121-104
New Orleans Pelicans - Dallas Mavericks 132-106
LA Lakers - San Antonio Spurs 121-113

NBA


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.