Fótbolti

River hafði betur gegn Boca í ótrúlegum úrslitaleik

Anton Ingi Leifsson skrifar
Mikill fögnuður í kvöld.
Mikill fögnuður í kvöld. vísir/getty
River Plate hafði betur, 3-1, gegn Boca Juniors í síðari leik liðanna í úrslitaleiknum í Meistaradeildinni í Suður-Ameríku og samanlagðum 5-3 sigur River Plate í leikjunum tveimur.

Eins og frægt er orðið var síðari leiknum frestað í síðasta mánuði eftir að allt sauð upp úr fyrir leikinn. Leikmenn Boca Juniors voru grýttir og rúta þeirra skemmd. Því var leikurinn færður yfir til Spánar og var spilaður á Santiago Bernabeu.

Á 44. mínútu kom fyrsta markið en Dario Benedetto kom þá River Plate yfir eftir að hafa sloppið einn í gegn eftir að hafa leikið á tvo varnarmenn River Plate. Þannig stóðu leikar í hálfleik.

“Heimamenn” í River Plate jöfnuðu svo metin á 68. mínútu er Lucas Pratto fékk sendingu inn á teiginn þar sem hann var einn og kláraði færið einstaklega vel. 1-1 og þannig var staðan er venjulegum leiktíma var lokið. Því var gripið til framlengingar þar sem útivallarmarkareglan er ekki við gildi í keppninni.

Boca varð fyrir áfalli í upphafi framlengingarinnar er Wilmar Barrios fékk sitt annað gula spjald og var þar af leiðandi sendur í sturtu. Ekkert mark var þó skorað í fyrri hálfleik framlengarinnar.

River komst þó í 2-1 á 109. mínútu með marki frá Juan Quintero og eftir það reyndu Boca-menn allt hvað þeir gátu til að jafna metin. Það tókst þó ekki þrátt fyrir skot í stöng og fleiri góð tækifæri og Gonzalo Martinez tryggði River 3-1 sigur í uppbótartíma.

Ótrúlegur endir því á Copa Libertadores þetta tímabilið og ekki sá fallegasti en það verður væntanlega fagnað vel í River Plate hluta borgarinnar í kvöld.




Fleiri fréttir

Sjá meira


×