Formúla 1

Uppgjör: Hamilton meistari í Mexíkó

Bragi Þórðarson skrifar
Hamilton er besti ökuþór heims í dag
Hamilton er besti ökuþór heims í dag Vísir/Getty

Lewis Hamilton tryggði sér heimsmeistaratitilinn í Formúlu 1 í mexíkóska kappakstrinum um helgina. Titillinn var hans fimmti á ferlinum og hefur hann því jafnað hinn magnaða Juan Manuel Fangio sem vann fimm titla á árunum 1951 til 1957.

Sebastian Vettel, sem átti einnig möguleika á að vinna sinn fimmta titil í ár, þurfti að vinna í Mexíkó til að halda titilvonum sínum á lífi.

Þjóðverjinn kláraði Mexíkó kappaksturinn annar á eftir Red Bull bíl Max Verstappen. Þriðji varð liðsfélagi Vettel hjá Ferrari, Kimi Raikkonen.

Ferrari eiga því enn möguleika á heimsmeistaratitli bílasmiða en ítalska liðið er þó 55 stigum á eftir Mercedes.

Hinn ungi Verstappen kom sá og sigraði en Hamilton tók fyrirsagnirnar vísir/getty

Magnaður Max í Mexíkó
Verstappen var í algjörum sérflokki á Hermanos Rodriguez brautinni í Mexíkóborg um helgina. Hollendingurinn náði besta tímanum í öllum þremur æfingunum fyrir kappaksturinn. Max þurfti þó að sætta sig við annað sætið í tímatökum á eftir liðsfélaga sínum, Daniel Ricciardo.

„Ég svaf mjög illa í nótt, ég var alls ekki sáttur eftir tímatökurnar í gær,“ sagði Verstappen eftir keppnina á sunnudaginn. Með ráspól gat Verstappen orðið yngsti ökumaður í sögunni til að ná þeim árangri.

Ricciardo fór illa af stað í kappakstrinum og missti liðsfélaga sinn, ásamt báðum Mercedes bílunum fram fyrir sig strax á fyrstu metrunum.

Ástralanum tókst þó að keyra sig upp í annað sætið og leit allt út fyrir að Red Bull bílarnir myndu klára í fyrsta og öðru sæti, í fyrsta skiptið í tæp þrjú ár.

Þegar aðeins níu hringir voru eftir gaf Renault vélin upp öndina aftan í Red Bull bíl Daniels og þurfti hann því frá að hverfa, í áttunda skiptið á árinu.

Hamilton er kominn í sögulegan hóp sigurvegara vísir/getty

Hamilton besti ökumaður þessarar kynslóðar
„Nú hef ég verið hér fimm sinnum, ég vill ekki hljóma eins og páfagaukur en tilfinningin er aldrei sú sama,“ sagði Lewis Hamilton eftir keppnina. Bretinn tryggði sér sinn fimmta titil með fjórða sætinu í kappakstrinum þrátt fyrir að tvær keppnir séu eftir.

Aðeins þrír ökumenn hafa náð þeim magnaða árangri að vinna fimm titla, Juan Manuel Fangio, Michael Schumacher og nú Lewis Hamilton. Michael vann alls sjö titla, met sem virtist ómögulegt að slá en hinn 33 ára Hamilton gæti vel náð þeim áfanga.

Hamilton byrjaði sinn Formúlu 1 feril árið 2007 og vann sinn fyrsta titil ári seinna. Hann er eini heimsmeistarinn sem unnið hefur kappakstur öll ár sem hann hefur keppt.

Bretinn hefur alla sína tíð keppt með Mercedes vél fyrir aftan sig, fyrst með McLaren og svo verksmiðjuliðinu frá 2013. Enginn hefur keppt jafn margar keppnir og Lewis fyrir sama vélarframleiðanda.

Hamilton á einnig metið fyrir að vera oftast á ráspól, met sem hann tók af goðsögninni Ayrton Senna. Þá þarf hann að vinna 20 keppnir og tvo titla til viðbótar til að verða besti ökumaður allra tíma. Á meðan verður Bretinn að sætta sig við að vera besti ökumaður sinnar kynslóðar.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.