Áhorfendum fjölgaði örlítið á milli ára í Pepsi-deild karla

Áhorfendum í Pepsi-deild karla í fótbolta fjölgaði um 20 að meðaltali á hvern leik á milli ára í Pepsi-deild karla en alls sóttu 113.297 leikina 132 sem spilaðir voru í sumar. Það gerir meðalfjölda upp á 858 á hvern leik en 838 sóttu leikina að meðaltali á síðustu leiktíð.

Áfram er áhorfendafjöldinn undir 900 að meðaltali á hvern leik en þar hefur hann nú verið tvö ár í röð. Síðast var hann undir 900 að meðaltali árið 2000 en eftir það fór aðsókn á leiki vel upp á við og toppaði árið 2007 þegar að 1.329 mættu að meðaltali en aðeins tíu lið spiluðu þá í deildinni.

Meðaltals aðsókn á leiki var 1.107 árið 2015 en hrapaði undir 1.000 ári síðar þegar að 975 sóttu leikina 132 að meðaltalið sumarið 2016. Hann hefur nú verið undir 900 tvö ár í röð.

Góður endasprettur

Leikið var þétt til að byrja með í Pepsi-deild karla vegna þátttöku íslenska landsliðsins á HM 2018 í Rússlandi. Níu umferðir voru spilaðar fyrir fyrsta leik á HM og mættu 974 að meðaltali á leikina í þeim umferðum.

Mætingin dalaði eftir HM og fram að Verslunarmannahelgi en 752 mættu að meðaltali á leikina í umferðunum sex frá HM og fram að frídegi verslunarmanna. Endaspretturinn var svo ágætur en að meðaltali mættu 800 manns á hvern leik eftir Verslunarmannahelgi.

Endaspretturinn lofar góðu og hjálpar vafalítið til að mikil spenna var í deildinni en erfiðir leiktímar þegar að hausta tekur hafa oft reynst erfiðir hvað varðar mætingu.

Aðeins 675 mættu á meðaltali á síðustu sjö umferðirnar í fyrra en 800 í sumar sem er jákvæð fjölgun.

Blikar bættu mest við sig

Fimm félög af tíu sem voru í deildinni í fyrra bættu við sig áhorfendum og fimm fóru niður á við í mætingu á milli ára. Flestir sóttu leiki Breiðabliks en í heildina komu 13.735 á leikina ellefu á Kópavogsvelli eða 1.249 að meðaltali á hvern leik.

Breiðablik var eitt þeirra liða sem tók alla umgjörð hjá sér verulega í gegn og það virðist hafa hjálpað til sem og augljóslega gott gengi liðsins sem endaði í öðru sæti deildarinnar.

Áhorfendum fjölgaði mest á milli ára hjá Blikunum en þeir voru með 1.081 áhorfenda að meðaltali í fyrra og fóru upp um 168 á hvern leik. Valsmenn bættu næst mest við sig eða 131 áhorfenda á hvern leik.

Valur fór úr 1.067 áhorfendum árið 2017 í 1.207 á þessu ári og er með næst bestu mætinguna. Sömuleiðis gerðu Valsmenn mikið fyrir umgjörðina á Origo-vellinum.

FH-ingar fengu níu fleiri að meðaltali á hvern leik í ár heldur en í fyrra eða 1.069 og Stjarnan var fjórða og síðasta félagið sem fór yfir 1.000 áhorfenda múrinn að meðaltali með 1.026 að meðaltali á hvern leik. Áhorfendum fjölgaði þar um 73 eða 131 á milli ára hjá Valsmönnum.

KR-ingar misstu flesta

KR náði ekki 1.000 áhorfendum að meðaltali á sína heimaleiki en alls sóttu 10.742 leiki Vesturbæjarliðsins í sumar. Það gerir meðaltal upp á 977 áhorfendur en 1.124 sóttu leiki KR að meðaltali í fyrra og er því um fækkun upp á 147 áhorfendur að ræða.

KA missti næst flesta áhorfendur á milli ára eða 96 en norðanmenn fengu 691 að meðaltali á sína heimavelli. Víkingar fengu 826 að meðaltali á heimavöll hamingjunnar og misstu 79 á milli ára. Áhorfendum fór einnig fækkandi hjá Grindavík og Fjölni.

Nýliðar Fylkis fengu flesta áhorfendur á útivelli eða 1.044 en Breiðablik og KR voru hin tvö liðin sem yfir 1.000 manns mættu að meðaltali á útileiki hjá.

Þetta er annað árið í röð sem aðeins fjögur félög fá yfir 1.000 manns að meðaltali á heimaleiki sína en Stjarnan komst upp í 1.000 áhorfenda klúbbinn í staðinn fyrir KR.

Engar sprengjur

Aðeins einu sinni í 132 leikjum í Pepsi-deildinni mættu fleiri en 2.000 áhorfendur á leik en það var fyrsti leikur deildarinnar. Alls mættu 2.489 á stórleik Vals og KR á föstudagskvöldi en færri sprengjur voru í mætingu en áður.

Næst flestir mættu á stórleik FH og Breiðabliks í þriðju umferð Pepsi-deildarinnar eða 1.826 og ríflega 1.600 manns mættu á báða leiki FH og KR.

Mætingin fór aldrei yfir 1.000 manns hjá liðunum utan höfuðborgarsvæðsins (Grindavík, Keflavík, ÍBV og KA) fyrir utan einn leik í Eyjum þegar að ÍBV mætti Fylki á miðri Þjóðhátíð.

Liðin á landsbyggðinni raða sér í neðstu fjögur sætin yfir mætingu í ár en ekkert þeirra fékk fleiri en 700 áhorfendur að meðaltali á hvern leik. Fæstir mættu í Keflavík eða 490 áhorendur á hvern leik að meðaltali.

Meðaltal á heimaleiki hvers liðs:

1. Breiðablik 1.249 (+168)

2. Valur 1.207 (+131)

3. FH 1.069 (+9)

4. Stjarnan 1.026 (+73)

5. KR 977 (-147)

6. Fylkir 848 (Nýliði)

7. Víkingur 826 (-79)

8. Fjölnir 788 (+110)

9. KA 691 (-96)

10. Grindavík 523 (-71)

11. ÍBV 598 (-42)

12. Keflavík 498 (Nýliði)

Meðaltal eftir umferðum:

1. umferð 1464

2. umferð 986

3. umferð 983

4. umferð 780

5. umferð 882

6. umferð 1036

7. umferð 1064

8. umferð 888

9. umferð 688

10. umferð 679

11. umferð 637

12. umferð 655

13. umferð 857

14. umferð 670

15. umferð 1015

16. umferð 750

17. umferð 805

18. umferð 828

19. umferð 766

20. umferð 718

21. umferð 747

22. umferð 987

Meðalaðsókn á Íslandi 2000-2018

2000: 899

2001: 1.076

2002: 996

2003: 1.025

2004: 1.026

2005: 1.070

2006: 1.089

2007: 1.329

2008: 1.106*

2009: 1.029

2010: 1.205

2011: 1.122

2012: 1.034

2013: 1.057

2014: 923

2015: 1.107

2016: 975

2017: 838

2018: 858

*Fyrsta ár í tólf liða deild