Fótbolti

Sara Björk: Hugsuðum bara um að vinna

Ástrós Ýr Eggertsdóttir skrifar
Sara í leiknum í dag
Sara í leiknum í dag vísir/vilhelm

Ísland þarf að öllum líkindum að fara í umspil til þess að komast á HM í Frakklandi eftir tap gegn Þjóðverjum á Laugardalsvelli í dag. Sara Björk Gunnarsdóttir sagði liðið hafa legið of langt niðri og það vantaði upp á síðasta þriðjunginn.

„Þetta er svekkjandi. Við fórum í leikinn til þess að vinna hann, við fórum ekki til þess að gera jafntefli eða tapa. Það eina sem var í hausnum á manni var að vinna og sækja þessi þrjú stig, en því miður gekk það ekki upp í dag,“ sagði landsliðsfyrirliðinn eftir leikinn.

„Þýskaland var bara því miður betra liðið.“

Svenja Huth skoraði rétt fyrir lok fyrri hálfleiks og bætti öðru marki við á 74. mínútu. Úrslitin þýða að Ísland lendir í öðru sæti í riðlinum nema að Færeyingum takist að vinna Þýskaland í lokaumferðinni, úrslit sem verða að teljast nær ómöguleg.

„Þær eru náttúrulega með frábært lið og við vissum það. Þær eru í heimsklassa, eitt besta lið í heimi, og við vissum alveg hvað við værum að fara út í. Samt héldum við í vonina um að vinna. Við gerðum það úti, við unnum þær 3-2 þar og auðvitað er möguleiki, en því miður ekki í dag.“

Hvað fannst fyrirliðanum vera það helsta sem vantaði upp á í leik Íslands í dag?

„Seinasta þriðjunginn, við vorum ekki með orku. Við sátum svolítið í lápressunni og svo þegar við unnum boltann þá vorum við að sparka honum svolítið langt, við sátum bara of langt niðri.“

„Þetta er ennþá hægt, við þurfum bara núna að fókusera á Tékkaleikinn og vinna hann,“ sagði Sara Björk Gunnarsdóttir.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.