Viðskipti erlent

Eftir miklu að slægjast í vösum asískra ferðamanna

Stefán Ó. Jónsson skrifar
Kátir kínverskir ferðamenn við Buckingham-höll í Lundúnum.
Kátir kínverskir ferðamenn við Buckingham-höll í Lundúnum. vísir/getty

Gríðarlega auðsöfnun á undanförnum árum hefur leitt till þess að flestir auðjöfrar heimsins koma nú frá ríkjum Austur-Asíu. Tíu milljón kínversk vegabréf verða gefin út árlega á komandi árum og því eftir miklu að slægjast fyrir ferðaþjónustufyrirtæki heimsins.

Sem fyrr eru Bandaríkin þó heimkynni flestra ofurríkra í heiminum, en í úttekt Forbes má sjá að bandarískir milljarðamæringar, mælt í bandaríkjadölum, eru 585 talsins. Kína og Hong Kong koma þar á eftir með sína 373 milljarðamæringa.

Sé hins vegar litið á Austur-Asíu sem eitt landsvæði snýst taflið við. Heildarfjöldi milljarðarmæringa í Kína, Hong Kong, Indlandi, Japan, Suður-Kóreu, Tælandi og Víetnam í fyrra var rétt rúmlega 600. Þar að auki má finna flesta þá sem eiga meira en milljón bandaríkjadali, umfram virði lögheimilis síns, í þessum ríkjum.

Þó um sé að ræða mörg af fjölmennustu ríkjum heims, og hlutfallslegur fjöldi milljarðamæringa sé því ekki hár, er þessi þróun þó til marks um þann mikla auð sem safnast hefur upp í ríkjunum við vesturströnd Kyrrahafsins.

Ma Huateng, einnig þekktur sem Pony Ma, er ríkasti Asíubúinn. Vísir/Getty

Talsmaður greiningarfyrirtækisins Capgemini segir í samtali við breska ríkisútvarpið að auðsöfnunin hafi ekki síst verið drifin áfram af miklum hagvexti í Kína á undanförnum árum. Hann var að jafnaði á bilinu 8 til 11% á árunum 2008-2012, tímabili sem markaðist af niðursveiflu á mörkuðum í Vesturheimi.

Kröftugur hagvöxtur á Indlandi, ásamt jöfum hækkunartakti í hinum þróaðri hagkerfum Singapúr, Hong Kong og Japans hafi að sama skapi leikið stórt hlutverk í auðsöfnuninni.

Ríkasti maður Asíu er Ma Huateng en hann er í sautjánda sæti yfir ríkustu einstaklinga heims á Forbes-lista ársins. Hann er framkvæmdastjóri fjarskiptarisans Tencent Holdings sem rekur meðal annars weChat, gríðarvinsæla skilaboðaþjónustu í Kína. Hann er metinn á 45,3 milljarða bandaríkjadala, næstum 5000 milljarða íslenskra króna.

Jack Ma, forstjóri smásölunnar Alibaba, er einnig á meðal 20 ríkustu einstaklinga heims. Alibaba er nú orðið eitt allra verðmætasta fyrirtæki heims en hlutabréfaverð í félaginu tvöfaldaðist á síðasta ári. Jack Ma er metinn á 39 milljarða bandaríkjadala.

Kínverjar eru stærsti ferðamannahópur heimsins. Fimmta hver króna sem ferðamenn eyða í heiminum kemur úr vösum Kínverja. Vísir/getty

Það er þó ekki aðeins ofurríkum sem hefur fjölgað í Austur-Asíu að á síðustu árum. Millistéttin í Kína hefur einnig stækkað hratt á undanförnum árum og talið er að hún telji nú rúmlega 400 milljón manns. Þessi þjóðfélagshópur hefur varið nýfengnu auð sínum í ferðalög og er nú svo komið að kínverska millistéttin myndar fjölmennsta ferðamannahóp heimsins.

Alls ferðuðst 130 milljón Kínverjar til útlanda í fyrra, sem var sjö prósent aukning frá fyrra ári, og talið er að um 10 milljón ný vegabréf verði gefin út í Kína, á hverju ári, í náinni framtíð. Ferðamannastofnun Sameinuðu þjóðanna áætlar að Kínverjar beri jafnframt ábyrgð á fimmtungi heildarneyslu allra ferðamanna heimsins.

Fjórðungur starfa sem verða til í heiminum næsta áratuginn verða í ferðaþjónustu. Greinendur telja að það verði ekki síst kínverska millistéttin sem muni með ferðalögum sínum ýta undir þá þróun.

Ætla má að forráðamenn íslensku flugfélaganna séu fullmeðvitaðir um þessa framtíðarsýn. Bæði WOW Air og Icelandair hafa lagt allt kapp á að hefja beint flug til Asíu. Fyrsta Indlandsflug WOW er fyrirhugað í desember næstkomandi og vonast Icelandair til að hefja áætlunarflug til Indlands frá og með haustinu 2019.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
MARL
0,13
5
93.108
VIS
0
3
9.252
ORIGO
0
1
5.125
SJOVA
0
6
57.051
TM
0
1
15.150

Mesta lækkun dagsins


Félag
Br.%
Fjöldi
Velta*
REGINN
-2,06
5
38.300
SIMINN
-1,84
5
90.353
N1
-1,65
6
126.050
REITIR
-1,52
3
54.714
SYN
-1,42
5
94.490
Velkomin á Vísi. Þessi vefur notar vafrakökur. Sjá nánar.