Innlent

„Aumingja maðurinn hefur greinilega ekki vitað að ég sé garðyrkjumaður“

Jakob Bjarnar skrifar
Eftir því sem deilur þeirra Dags og Vigdísar magnast, þeim mun erfiðara reynist að fá botn í þær.
Eftir því sem deilur þeirra Dags og Vigdísar magnast, þeim mun erfiðara reynist að fá botn í þær.

Borgarbúar sem aðrir landsmenn eru nú að verða vitni að heldur flóknum deilum í borgarstjórn sem einkum birtast í harðri rimmu Dags B. Eggertssonar borgarstjóra og Vigdísar Hauksdóttur, fulltrúa Miðflokksins í minnihluta borgarstjórnar.

Samfylkingarfólk klappar fyrir borgarstjóra

Samfylkingarfólk er helst á því að Dagur hafi hirt Vigdísi svo um munar á fundi borgarstjórnar í dag í ræðu þar sem hann beinir spjótum sínum að henni. Vísir greinir ítarlega frá efni ræðunnar en þar segir meðal annars. „Hann [Dagur] sagði Vigdísi ekki hafa dregið þau ummæli sín til baka þó að maður gangi undir manns hönd til að upplýsa að ekki sé um eineltismál sé að ræða.“

Þingmennirnir Helga Vala Helgadóttir og Logi Einarsson formaður Samfylkingar eru ánægð með sinn mann: „Takk Dagur,“ segir Helga Vala á Facebook og Logi segir: „Gott Dagur.“


Dagur kominn út í skurð

Vísir bar þetta undir Vigdísi sem segist ekki skilja þessi ummæli. „Hann er kominn langt út í skurð. Gögnin sem ég hef lagt fram tala sínu máli og ég er enn að bíða eftir opinberri afsökunarbeiðni frá borgarritara og hinum dæmda skrifstofustjóra,“ segir Vigdís.

En, þessi meginflötur deilu Vigdísar og Dags snýr að kæru fjármálastjóra á hendur skrifstofustjóra í Ráðhúsinu, sem rataði fyrir dómsstóla hvar niðurstaðan var sú að áminning á hendur honum var látin niður falla.

Dagur telur að Vigdís hafi, með þessari myndbirtingu verið að gera lítið úr starfsmanni borgarinnar. Vigdís telur ljóst að borgarstjóra sé ekki kunnugt um að hún er garðyrkjumaður.

Dagur sagði á borgarstjórnarfundi að hvorugur þessara aðila ætti í deilum um hvort um eineltismál væri að ræða en Vigdís hefði varið sumrinu í að ræða það sem slíkt og að um dóm í eineltismáli væri að ræða.

Vigdís telur þetta ódýran spuna og ljóst að þetta mál skrifstofustjórans sé að reynast Degi afar erfitt.

Að vökva blóm í rigningu

Illdeilur Dags og Vigdísar tóku svo einkennilegan snúning í því sem tengist mynd af starfsmanni borgarinnar sem var að vökva blóm í rigningu. Vigdís henti gaman að þessu á Facebooksíðu sinni en Dagur telur það til marks um að hún sé að gera lítið úr starfsfólki borgarinnar. „Mér finnst ekki sæm­andi að beina spjót­um úr stól­um kjör­inna full­trúa að al­menn­um starfs­mönn­um þannig að fólk geti skilið það svo að það sé verið að gera lítið úr því,“ sagði borgarstjóri meðal annars.

„Aumingja maðurinn hefur greinilega ekki vitað að ég sé garðyrkjumaður,“ segir Vigdís.


Segir borgarstjóra rökþrota

„Hann hefði þá átt að snappa á mig og út af skrifstofustjóranum sínum – en ekki út af einhverri mynd á Facebook - svo laug hann því að Eyþór Arnalds hafi birt þessa mynd líka og talaði svo um brauðmylsnu á borði - ég er algjörlega orðlaus,“ segir Vigdís. En, bætir þó við:

„En, þú lýgur sama hlutnum nógu oft þá er smá séns að fólk trúi lyginni fyrir rest. Það er þekkt pólitísk aðferð að viðurkenna aldrei mistök, sama hvað, heldur snúa því máli upp í persónulegt skítkast út í þann sem ber það uppi og er merki um algjör rökþrot.“

Af ummælum Vigdísar má ráða að hvergi nærri er séð fyrir enda á harkalegum átökum á vettvangi borgarstjórnar í vetur.


Tengdar fréttir

Vigdís vill fá opinbera afsökunarbeiðni

Vigdís Hauksdóttir, borgarfulltrúi Miðflokksins, fór fram á það á fundi borgarráðs í dag að borgarritari og skrifstofustjóri á skrifstofu borgarstjóra og borgarritara biðji hana opinberlega afsökunar.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.