Innlent

Krefja Kristínu Soffíu um afsökunarbeiðni

Tryggvi Páll Tryggvason skrifar
Ummæli Kristínar Soffíu Jónsdóttur virðast hafa farið fyrir brjóstið á Eyþóri Arnalds og félögum hans í minnihluta.
Ummæli Kristínar Soffíu Jónsdóttur virðast hafa farið fyrir brjóstið á Eyþóri Arnalds og félögum hans í minnihluta. Fréttablaðið/Sigtryggur Ari/Stefán

Fulltrúar Sjálfstæðisflokksins, Miðflokksins og Flokks fólksins í skipulags- og samgönguráði Reykjavíkurborgar vilja að Kristín Soffía Jónsdóttir, borgarfulltrúi Samfylkingarinnar, biðjist afsökunar og að hún dragi ummæli um að fulltrúar Sjálfstæðisflokksins hafi brotið trúnað eftir að þeir gengu út af fundi ráðsins í síðustu viku til baka.

Þetta kemur fram í bókun fulltrúa flokkanna á aukafundi ráðsins sem haldinn var á föstudaginn efir umdeildan fund ráðsins á miðvikudag.

Deilur hafa staðið yfir um lögmæti fyrri fundarins en fulltrúar Sjálfstæðisflokksins vilja meina að til fundarins hafi ekki verið boðað með lögmætum hætti, því væri hægt að véfengja lögmæti fundarins og þær ákvarðanir sem þar væru teknar fyrir dómstólum. Gengu Hildur Björnsdóttir, Eyþór Arnalds og Valgerður Sigurðardóttir því af fundinum

Sjá einnig: Segir Sjálfstæðismenn hafa brotið trúnað og skrópað í vinnu fyrir flotta mynd

Ákvörðun borgarfulltrúanna þriggja var harðlega gagnrýnd af Kristínu Soffíu sem sagði útspil borgarfulltrúanna þriggja vera „hugsanlega vanhugsaðasta og vandræðalegasta upphlaup“ sem hún hafi upplifað á ferli hennar í stjórnmálum.

„Þeim er gert fullkomlega ljóst að trúnaður ríkir um fundinn þar til honum er slitið en þau kjósa að brjóta þann trúnað - svo spennt að komast í fréttirnar. Til hamingju Reykvíkingar, þau brutu trúnað, skrópuðu í vinnunni og misstu af öllum kynningum til þess eins að fá þessa fínu mynd af sér,“ skrifaði Kristín Soffía á Facebook eftir fundinn.

Á ýmsu hefur gengið í borgarstjórn Reykjavíkur að undanförnu en Líf Magneudóttir, borgarfulltrúi VG, hefur verið sökuð um að „ulla“ á fulltrúa Sjálfstæðisflokksins. Vísir/Vilhelm

Segja engum trúnaðarupplýsingum hafa verið komið á framfæri

Þessi ummæli Kristínar Soffíu virðast hafa farið fyrir brjóstið á fulltrúm minnihlutans í skipulags- og samgönguráði og létu fulltrúar hans bóka eftirfarandi á aukafundinum á föstudaginn.

„Minnihlutinn skora á borgarfulltrúa Kristínu Soffíu að draga ummæli sín til baka og biðjast formlega afsökunar á röngum sakargiftum. Engum trúnaðar upplýsingum var komið á framfæri enda sátu borgarfulltrúar minnihluta ekki fundinn eins og skýrt kemur fram í fundargerð. Það getur ekki staðist að trúnaður sé um þá staðreynd að borgarfulltrúar neiti að taka þátt í fundi sem ranglega er staðið að. Það er okkar skylda að sjá til þess að rétt sé staðið að ákvarðanatöku borgarinnar.“

Sjá einnig: Segir Lív einnig hafa „ullað“ á Eyþór

Sem fyrr segir telja fulltrúar minnihlutans að fundur skipulags- og samgönguráðs á miðvikudag hafi ekki verið boðaður með réttum hætti og því hafi ekki verið hægt að taka bindandi ákvarðanir á fundinum. Lögðu fulltrúar minnihlutans fram lögfræðiálit frá lögfræðistofunni BBA Legal til þess að rökstyðja mál sitt og ætlar minnihlutinn að senda inn formlega kvörtun vegna þessa máls til Samgöngu og sveitastjórnarráðuneytis.

Lögfræðingar umhverfis- og skipulagssvið Reykjavíkurborgar, sem og lögfræðingur miðlægrar stjórnsýslu, telja þó að til fundarins hafi verið boðað með löglegum hætti. Allir fulltrúar ráðsins hafi vitað af fundinum en á vef borgarinnar segir að tímabundin bilun í tölvukerfi hafi orðið þess valdandi að ákveðnir ráðsmenn fengu boðun á fundinn seinna en aðrir.


Tengdar fréttir

Harka leysir af samráð í pólitík

„Það er svona aukin sundrung sem hefur verið að færast í stjórnmál á Vesturlöndum á liðnum árum og þessari auknu sundrungu hefur fylgt aukin harka í hinni pólitísku umræðu frá því sem verið hafði til skamms tíma,“ segir Eiríkur Bergmann, prófessor í stjórnmálafræði, aðspurður um þá stemningu sem ríkt hefur í borgarstjórn frá kosningum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.