Mesti listaverkaþjófnaður allra tíma fyrir 107 árum

Benedikt Bóas skrifar 21. ágúst 2018 07:15

Hér á að sjást hvernig Peruggia bar sig að inn í safninu. Ekkert sérstaklega flókið en árið var jú 1911.

Þennan dag árið 1911 gekk ítalskur maður, Vincenzo Peruggia, inn í Louvre-safnið í París og fjarlægði mynd eftir Leonardo da Vinci, sjálfa Mónu Lísu. Þá var hún ekki jafn fræg og í dag.

Vincenzo Peruggia í réttarsalnum í Flórens árið 1914, vel gætt af vopnuðum vörðum.

Peruggia var fyrrverandi starfsmaður Louvre-safnsins og sagðist hafa ætlað að hefna Ítalíu vegna misgjörða Napóleons í Napóleonstríðinu.

Flestir telja það hæpna útskýringu enda benti flest til þess að peningar hefðu stjórnað gjörðum þjófsins.

Móna Lísa kom aftur til Frakklands þann fjórða janúar árið 1914 og hefur ekki fært sig um set síðan.

Skellt var í lás á safninu í heila viku í kjölfar þjófnaðarins á meðan rannsókn stóð yfir og lögregluþjónar fínkembdu safnið í leit að vísbendingum.

Peruggia sagði að hann hefði stolið verkinu fyrir föðurlandið Ítalíu. Þar ætti það heima. Sagnfræðingar efast þó um það enda reyndi hann að selja verkið. Hann sat inni í sjö mánuði.

Guillaume Apollinaire, franskt ljóðskáld sem hafði eitt sinn viljað brenna Louvre-safnið til grunna, var fljótlega grunaður um þjófnaðinn og var handtekinn.

Móna Lísa var sýnt í tvo daga á Ítalíu í Uffizi safninu undir vökulu auga.

Apollinaire benti hins vegar á vin sinn Pablo Picasso, sem var einnig yfirheyrður, en báðum var síðan sleppt. Leitað var að málverkinu í yfir tvö ár án nokkurs árangurs. Eftir að hafa geymt verkið í kústaskáp í íbúð sinni í tvö ár varð Peruggia óþolinmóður og reyndi að koma því í verð.

Forsíðan á La Domenica del Corriere þann 3. september 1911. Þjófnaðurinn vakti að vonum mikla athygli í Frakklandi og upp komu ýmsar kenningar um hvarf Mónu Lísu. Flestir töldu þó ekki líklegt að hér hefðu fagmenn verið að verki því þeir hefðu án efa gert sér grein fyrir því hversu hættulegt væri að koma svo frægu listaverki í verð.

Í nóvember 1913 barst ítölskum listaverkasala bréf þar sem sagt var að Móna Lísa væri í Flórens og fengist í skiptum fyrir lausnargjald. Peruggia var handtekinn stuttu síðar þegar hann reyndi að nálgast peningana sem honum hafði verið lofað.

Mónu Lísu var í kjölfarið skilað til Louvre-safnsins í París þar sem hún er enn og brosir framan í heiminn bak við skothelt gler.