Innlent

Hvessir hressilega annað kvöld

Stefán Ó. Jónsson skrifar
Veðurstofan gerir ráð fyrir því að það geti orðið hvasst á landinu aðfaranótt föstudags.
Veðurstofan gerir ráð fyrir því að það geti orðið hvasst á landinu aðfaranótt föstudags. Veðurstofan

Veðurstofan varar við afleitu veðri á miðhálendinu, sem og á vesturhluta landsins, annað kvöld og á föstudagsmorgunn. Því hefur verið gefin út gul viðvörun. Búast megi við töluverðu hvassviðri og að hviður geti náð 35 m/s í vindstrengjum við fjöll. Þá verði einnig mikilli rigning sunnantil en þó verði úrkomulítið norðan jökla. Slagviðrið geti því verið varasamt fyrir ferðalanga eins og göngufólk, hjólareiðarfólk og tjaldbúa.

Þá megi búast við vægu næturfrosti á næstunni, ekki síst inn til landsins. Að þessu frátöldu gerir veðurfræðingur ráð fyrir að það lægi og létti til víða á landinu næsta sólarhringinn.

Veðurfræðingurinn segir:

„1012 mb hæðarhryggur er nú vestur af landinu og verður hann yfir landinu í nótt. Það lægir því um land allt og léttir til. Þegar að sólin sest hefst útgeislun frá jörðinni og kælir loftið, og þegar að vindur er hægur að þá nær kalda loftið við yfirborðið ekki að blandast hlýrra lofti sem er ofar. Því má búast við vægu næturfrosti inn til landsins, allt um 5 stigum í innsveitum norðanlands og enn kaldara á hálendinu. En sjórinn er ennþá hlýr og spyrnir á móti og frystir því sjaldnast við sjávarsíðuna, en árrisulir höfuðborgarbúar gætu kannski þurft að skafa í fyrramálið. Á morgun hlýnar svo með vaxandi suðaustanátt, 13-20 um kvöldið og fer að rigna.“

Veðurspáin fyrir næstu daga:

Norðan 5-10 en norðvestan 8-15 austantil fram á kvöld. Dálítil væta um norðanvert landið en bjartviðri syðra og rofar til norðanlands með deignum, fyrst vestantil. Hiti 6 til 14 stig að deginum, hlýjast á Suðurlandi. Hægviðri í nótt og hiti nálægt frostmarki, en vægt frost inn til landsins. Hægt vaxandi suðaustanátt á morgun og þykknar upp, 13-20 m/s annað kvöld og rigning en hægari vindur og léttskýjað norðaustantil. Hiti 8 til 16 stig á morgun, hlýjast á Austurlandi.

Á fimmtudag:
Hægt vaxandi suðaustan og þykknar upp, 13-20 m/s um kvöldið og rigning eða súld. Hiti 8 til 12 stig. Hægari vindur og bjartviðri norðaustan- og austanlands með hita að 17 stigum. 

Á föstudag:
Sunnan 10-18 framan af degi og rigning, talsverð rigning sunnanlands. Suðvestan 8-13 síðdegis og skúrir, en léttir til um landið norðan- og austanvert. Hiti 7 til 17 stig, hlýjast á norðaustanverðu landinu. 

Á laugardag:
Suðvestan 8-15 og rigning eða súld, en heldur hægari og bjart norðaustan- og austantil. Hiti 7 til 14 stig, hlýjast á Austurlandi. 

Á sunnudag:
Fremur hæg vestlæg eða breytileg átt og dálítil væta í flestum landshlutum. Hiti 4 til 12 stig, svalast norðvestantil. 

Á mánudag:
Suðvestanátt, víða 8-13, og rigning eða súld en léttskjað norðaustantil. Hiti 7 til 12 stig. 

Á þriðjudag:
Útlit fyrir suðvestanátt með dálítlli vætu vestantil á landinu, en þurrt og bjart austanlands. Hiti breytist lítið.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.