City byrjaði titilvörnina á sigri

Englandsmeistarar Manchester City byrjuðu titilvörn sína á sigri á Arsenal í fyrsta stórleik tímabilsins á Emirates vellinum í Lundúnum í dag.

City byrjaði af sama krafti og þeir luku tímabilinu í vor og komust verðskuldað yfir snemma í fyrri hálfleik. Raheem Sterling skoraði glæsilegt mark.

Sóknartilburði Arsenal í fyrri hálfleik mátti telja á fingrum annarar handar og var forysta City í hálfleik verðskulduð.

Í seinni hálfleik var aðeins minna um fína drætti og Arsenal fékk aðeins meira að snerta boltann. City var þó meira með hann og hættulegra í sínum aðgerðum.

Sergio Aguero komst í dauðafæri á 63. mínútu en Petr Cech varði vel. Mínútu seinna var Bernardo Silva hins vegar búinn að tvöfalda forystu City.

Engin flugeldasýning frá City en nokkuð þægilegur sigur þó.