Gerrard náði í fyrsta sigurinn

Steven Gerrard stýrði Glasgow Rangers til sigurs í fyrsta skipti í dag. Liðið lagði St. Mirren á heimavelli þrátt fyrir að hafa leikið manni færri í klukkutíma.

Rangers gerði jafntefli í fyrsta leik sínum í deildinni undir stjórn Gerrard og fyrsti sigurinn kom í dag.

Alfredo Morelos kom Rangers yfir á 14. mínútu og tíu mínútum seinna kom Connor Goldson þeim í 2-0.

Ross Mccrorie var rekinn af velli með beint rautt spjald á 31. mínútu og þurftu heimamenn í Rangers að leika manni færri í klukkutíma. Það kom ekki að sök, mörkin urðu ekki fleiri og 2-0 sigur Rangers niðurstaðan.

Liðið er því með fjögur stig að tveimur leikjum loknum í skosku úrvalsdeildinni.