Innlent

Aflífa grísi eftir eld hjá Stjörnugrís

Gissur Sigurðsson skrifar
Um 160 fullvaxta grísir voru í húsinu þegar eldurinn kom upp.
Um 160 fullvaxta grísir voru í húsinu þegar eldurinn kom upp. Vísir/GVA

Eldur kom upp í svínabúi Stjörnugríss í Saltvík á Kjalarnesi um klukkan eitt í nótt. Slökkviliðið á höfuðborgarsvæðinu sendi bíla og mannskap frá öllum stöðvum auk þess sem útkallsaðilar á Kjalarnesi voru kallaðir út.

Voru þeir fyrstir á vettvang og kom þá í ljós að eldur var ekki mikill, en töluverður reykur um allt hús, en þar voru 160 fullvaxnir grísir í stíum.

Greiðlega gekk að slökkva eldinn en slökkviliðsmenn voru til klukkan fjögur í nótt að reykræsta húsið.

Þónokkrir grísir sýndu merki um reykeitrun og úrskurðuðu dýralæknar sem kallaðir voru á vettvang að aflífa þyrfti nokkra þeirra en að aðrir myndu líklega ná sér. Það kemur í ljós þegar líður á daginn.

Eldsupptök eru ókunn en líkur benda til að eldurinn hafi kviknað í hita- eða loftræstiblásara.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.